1297/2023-2024

Champhai the 28th July, 2023 - Vawiin chawhma khan DC Conference Hall Champhai ah Champhai DC Pu James Lalrinchhana kaihhruaiin Champhaia Independence Day 2023 hman dan tur rel a ni.

Champhai a Sawrkar Department, zirna in leh Bank hotute, zirlai pawl leh tlawmngai pawl hrang hrang aiawhte meeting ah hian an tel a ni.

Meeting kaihruaitu Champhai Bawrhsap Pu James Lalrinchhana chuan India ram tana ni pawimawh berte zinga mi Independence Day ropui leh hlawhtling taka Champhai a hman a ni theih nan kalkhawmte chu an chanpual theuh ngai pawimawh a thahnemngai taka thawk ho tura chahin sawrkar hnathawk, zirlai leh khawtlang mipuite chu a lawmnaa tel vek turin a sawm a ni.

Meeting ah hian Independence Day 2023 hman dan tur chipchiar taka duan niin Department-te mawhphurna sem fel a ni a. Independence Day lawmna hi Chhangphut Field-ah chawhma dar 10:00 ah hman ni se tih niin, field a program hman zawhah Jericho Garden, DC Bungalow ah 'VIP's At Home' hun hman chhunzawm nghal a ni ang. Transport, EF&CC etc changtu Minister Pu TJ Lalnuntluanga chu khuallian ni tura beisei a ni.

Indepedence Day 2023 lawmnaah hian Ceremonial Parade neih leh tur niin parade contingent 24 tel thei tura beisei an ni a. Parade contingent-te inzirlawkna chu August ni 7 atanga tana final rehearsal August ni 11 a neih nise tih a ni.

He hunah hian Department hrang hrangte Fund Contribution pek tur zat bithliah nghal niin, Celebration Committee chuan an thawhlawm tur chu pe ngei turin a ngen a. Independence Day ropui taka lawm a nih theih nan mahni chanvo theuh tha taka hlen turin meeting chuan mawhphurhna latu zawng zawngte a ngen bawk a ni.