1298/2023-2024

Champhai, the 28th July, 2023: Tukin khan Transport Minister Pu T.J. Lalnuntluanga chuan Champhai Venglaia Community Multipurpose Convention Centre sakna tur hmunhma leh hmalak dan turte a enfiah a, hemi hnu hian District Transport Office (DTO), Champhai Kahrawt Venga sak mek tlawhin a enfiah bawk.

Pu T.J. Lalnuntluanga chuan hun rei tawh tak atangin Champhai Venglaiah Community Multipurpose Convention Centre sak tuma ruahmanna kalpui a nih thu sawiin, khawtlang leh Department lamte nena inbiakrawnna neih a nih hnuah Health Sub-Centre awmna rama sak tum a nih thu leh Department kutah ram neitu nihna a la awm reng dawn thu sawi a. Community Multipurpose Convention chu khawtlang tana tangkai leh chhawrnahawm tak tur a nih thu a tarlang bawk.

Community Multipurpose Convention Centre Champhai Venglai hi SASCI sum cheng nuai 90 senga sak tum niin, Health Sub-Centre, Bazar leh Garage-te a kengtel dawn a. Hemi puala Venglai VC House-a inrawnkhawmna hun buatsaihah a ranglama Community Multipurpose Convention Centre sak a nih theih nana hmalak tul hrang hrangte bakah Health Sub-Centre inbun lailawkna tur hmunhma chungchangte ngaihtuahho a ni a. Champhai South bialtu MLA ni bawk Pu T.J. Lalnuntluanga chuan a sakna tur hmunhma thiah leh senghawi senso phuhruk nan sumfai Rs 20,000/- VC kutah a hlan a, Health Sub-Centre inbun lailawkna tur Venglai Community Hall enfiah nghal niin, MLA fund Rs 1,00,000/- hmanga cheibawl dan turte sawiho a ni.

Hemi hnu hian NEDP sum cheng nuai 262 senna tur District Transport Office (DTO), Champhai Kahrawt Venga sak mek pawh tlawhin a enfiah bawk a. Transport Minister Pu T.J. Lalnuntluanga chuan hna thawktute chu hna tlo leh tha tak hun tiam chhunga zo hman ngei tura tan la zel turin a chah a ni.

Transport Minister Pu T.J. Lalnuntluanga hi Dr. PC Lalhmingliana CMO, Dr. Manesia Khaimeichho DTO, Dr. Vanzarliani SMO, Official dangte leh khawtlang hruaitute'n an tawiawm a ni.