Vawiin chawhnu khan Food Civil Supplies & Consumer Affairs Minister Pu John Rotluangliana chuan NGO hruaitute chu ama Office ah lenga sawm in tunlai Mizoram chhunga buhfai leh gas dinhmun te a hrilh a. Buhfai leh Gas kan intodelh tawk lohna leh harsatna awm thei ah sawrkawr hmalakna te pui tur leh mipuiten buhfai eitur an tlakchham loh nan a FCS & CA hnathawh mek te hriatpui tur leh thlawp turin a sawm a ni.
FCS & CA Minister Pu John Rotluangliana chuan state tam zawkah chuan an state mipuite zingah ration buhfai la chu 30% aia tlem zawk mah te an nih laiin Mizoram ah chuan ration hi a state mipui za ah za in kan khul a, buhfai hnianghnar taka sem a ngai si a harsatna tam tak sawrkar in a hmachhawn thin a ngai a ni a ti. Food Corporation Of India(FCI) in Mizoram mipui awm zat atanga a chhut hnu a thla 1 quota, Mizoram in man pangai aia tlawm zawka a leih theih zah a bituk sak chu quintals 52,210/- a ni a. Mahse hei hi Mizoram in a khawp loh avangin thlatin economic cost, quintal 1 zela Rs. 2,000/- chuang sengin additional allocation dil belh leh hnuah quintal 80,000/- chuang a lei belh ziah a ni a ti a. Heng te hi then hrang lehin APL tan Kg 1 chu Rs 9.30 a retailer te a leitir chu an ni hian Rs. 9.50 in an zuar chhawng leh a, BPL tan Kg 1 Rs. 6 leh AAY tan Kg 1 Rs. 3 ten leitir leh an ni a ti. Buhfai hralhna atanga hmuhlet hian buhfai leina hi a phuruk zo lo hle mai a, thlatin Rs 12 crore chuang sawrkarin buhfai hralhna atangin a hmulet leh tawh lo thin a ni ti a ti a.
Buhfai kan mamawh a tam em em laiin additional allocation pawh rate sang tak lo chuan FCI atangin kan hmu thei tawh lova, mipuiten buhfai kan nghei lohna tura sawrkarin hma a lak mek zel lai hian Buhfai semchhuah tur chat lak zeuh a awm thei a chutih hun pawh chuan mipuiin sawrkar hmalakna an rin ngam a ngai dawn a ni tiin NGO hruaitute chu Sawrkar thawhpui tur leh finchhuah thin turin a chah a ni. Rel kawng zauh hna thawh a nih dawn avangin October thla atang khian Bairabi khua ah hun rei vaklo chu buhfai phur rel a rawn lut tawh dawn lova. Mizoram buhfai mamawh hi FCI in carrying contract tender a chhuah chhangtuten Truck hmangin Gwahati atangin NH54 ah an rawn phur lut tawh zawk dawn a. Hei hi Mizoram mipuiten ei tur kan tlakchham mai loh nan harsatna awm lo va Mizoram FCI godown-te a thlen a pawimawh hle dawn a ni a ti. Mizoram lirthei lian neituten hnamdang lirthei lian buhfai phur reng reng Vairengte leh Bualpui bak pel lo tura kawngpui dan chah an tum tih hriat a ni a, hei hian mipuite tan harsatna lian tham a thlen theih avangin lirthei neitute pawh tlawmngai a an thiltum te thulh turin a ngen thu a sawi bawk a ni.
Minister chuan Gas semchhuah tam leh tlem chu Gas agent-te leh company-te inkara sumdawnna thil a nih avangin chinfel a harsa thin a. Amaherawhchu, vawi eng emaw zat Agent te nen an inkawm hnu ah rah tha a chhuak tan mek zel a ni a ti. Mizoram in gas a dawn thin te lo tlem tial tial ti ziaawm turin Union Minister of State for Petroleum and Natural Gas, Pu Dharmendra Pradhan pawh New Delhi ah dawr tawhin IOC Regional Manager, Silchar ami pawh a kawm tawh a ni a ti. Pu John Rotluangliana chuan Mualkhang Gas plant chu duhthusama a len tawk loh avangin Sairang ah Gas bottling plant dang siam belh a nih theih nan sawrkarin hma a la mek a ni a ti a. Sawrkar ram bigha 26 a zau chu IOC hnenah Gas bottling plant hmun din nan a siam turin a ngen tawh a ni a ti.
Vawiin FCS & CA Minister leh NGO hruaitute inkawmna ah hian amah puitu Pu T.T. Zothansanga, Parliamentary Secretary, Pu Nihar Kanti, MLA, Pi Vanlalawmpuii Chawngthu, MLA te bakah Pu R.Lalvena, FCS & CA Secretary leh mipawimawh dangte an tel a ni.
