Tun hnai Mizoram khawthlang lama boruak thlithlaia zuk kal FCS&CA Minister Pu H.Rohluna chuan zan khat riaka Hriphaw leh Kolalian khuate a tlawh hnuin vawiin chhun khan dam takin Aizawl a lo thleng leh ta.

 

 

Chief Minister tirha zuk kal FCS&CA Minister hian Hriphaw leh Kolalian-ah khawtlang hruaitute kawmin tun hnai thil thleng chungchang chipchiar takin a sawipui a. Hriphaw khuaa vantlang inkhawm nimin chhuna neihah Minister chuan beiseiphak hauh lovin tun hnaia buaina chhuak chu Mizoram sorkar pawhin pawi a ti tak zet a, chuvangin Chief Minister duh dan ang ngeia helai bial rawn tlawh a nih thu a sawi a. Dan leh thupek kenkawh chungchangah pawh sorkar chu a khauh hle dawn a ni tiin pawikhawitute pawh man chhuah ngei an ni ang a, hemi chungchangah hian mipuite pawh police te hnathawhah harsatna siam lova theihtawp chhuahpuiah a sawm a ni. Hnam hrang hrang awmkhawmte hian ingeih leh inlungrual taka khawsak ho kan zir a pawimawh hle a ni, a ti bawk.

Kolalian khuaa buaina chhuaka tuartu chhungkuate hnenah Minister chuan an tawrhna leh thilthleng te chu Mizoram sorkarin a hai lova, anmahni chhawmdawlna leh inbenbelh zuina tur pawh a tul anga ngaihtuah sak an nih tur thu a hrilh a ni. Kolalian khuaa chhungkuate hi chhawmdawlna hmasa atan Blanket 2, Silpaulin 1 leh an eitur buhfai, dal leh chi pek an ni tawh a, an mamawh dan ang zela ngaihtuah zui an ni.