Nimin khan FCS&CA Minister Pu John Rotluangliana chuan Borkhola LPG Bottling Plant a tlawh.

He hunah hian Minister hi FCS&CA Official te’n an tawiawm a, Borkhola LPG Bottling plant hotute kawmin Mizoram ina LPG Supply kan hmuh dan kalphung a sawipui a. Tun hnaia Mizoram in LPG Supply kan dawn tlem nachhan a zawh chuan Borkhola Bottling Plant a Senior Plant Manager Pu Sh. Lal Ngaisang Khozol chuan tunlai LPG Supply tlem nachhan chu Gas thunkhah na khawl (carouser) an siam belh vang niin a chhang a. He khawl siambelh a nih lai hian Hot works (welding etc) te khawih a ngaih avangin chetsualna leh intipalh awm thei (accident) laka in ven nan carouser hmanlai chu chawlh tir a ngai thin a, hei hian nikhat a an gas thun khah thin ang pangai chu thun khat hman lovin LPG supply a tih tlem phah anih thu a tarlang a. Carouser siam belh a nih chhung hian kalphung pangaia nikhata Gas bur an thun khah thin Truck trip 50 vel chu a zahve ah a tlakhniam phah a, truck trip 25 vel chauh an thunkhat (refill) hman thin a hemi avang hian LPG Supply chu tun hnaiah a tlakhniam phah thu a sawi bawk.

Pu John Rotluangliana chuan Mizoram ina LPG Supply nikhata kan dawn zat chu tipung tura hrilhin Mizoram tan nikhatah Truck Trip 12 atanga 15 inkar tal supply tura a sawi chu Pu Lal Ngaisang khozol chuan an tihhlawhtlin tur thu a sawi a, hemi bakah hian Carouser an siam belh chu June thla atanga hman tan theih a nih tur thu tarlangin Carouser 2 hman a nih hnu chuan nikhatah Truck Trip 100 vel Gas an thunkhah (refill) hman tur thu sawiin hei hian LPG Supply a harsatna awm thin chu a ti zia awm viau dawn niin a sawi bawk.

Supply Minister chuan Mizoram puma LPG Supply a harsatna awm thin chu sutkian a nih theih nan District hrang hrang a Gas Agency te chu Borkhola Bottling Plant atanga khaihlak awmloa pekchhuah (supply) an nih theih nan hma la tura hrilh bawkin, Sr Plant Manager chuan hemi chungchang pawh hi a tahtawlin hmalak dan an ngaituah chhoh zel tur thu in a chhang bawk ani.

Hemi bakah hian Transport Minister ni bawk chuan Sonai Road a Mizoram Transport Department ram chu a hmunah kalin a tlawh a, helai hmuna hmalak tumna te chu enfiah in Transport Department hotute a sawipui a, thlenna in(guest house), staff quarters sak na tur, ticketing counter sak na tur leh a kaihhnawih hrang hrang sak bakah MST bus hun na tur ruahmanna an neih te chu sawipuiin silchar a zin veivak mizo mupuite tana kawng awlsam zawk tur leh remchang zawk tura a hriat te a sawipui bawk a , Transport Department hotute chu sawihona atanga ruahmanna tha zawk an siam tur chu a rang thei ang bera hrilhhriat turin a ti bawk.

Pu John Rotluangliana chuan Silchar Mizoram House Dy.Resident Commissioner (DRC) Pi Saizikpuii, MCS leh Silchar Branch YMA hruaitute chu a thlenna Mizoram House ah a kawm bawk a, DRC leh Branch YMA hruaitute chuan Silchar a Mizo chengte ina harsatna leh mamawh hrang hrang an neih te an thlen a, heng zingah hian khualzin te tana a awlsam zawk nan MST Bus chu Mission compound atanga chhuah tir, Silchar Zofa te Inpui ‘Mizoram House’ compound cheibawl, Staff Quarters’ sak that leh Silchar a Mizo Damlo in entir/enkawl bakah harsatna tawkte buapui dan chungchang te an sawiho a, Minister chuan a theihna zawna tanpui a inhuam reng thu sawiin Silchar Branch YMA te’n an mamawh na a an hman turin tanpuina sumfai a hlan bawk a ni.