1322/2022-2023

Kolasib dated 22nd July 2022: Vawiin chawhma khan Diakkawn, Kolasibah Sub-Headquarters YMA hmalaknaa kumin chhunga ruihtheih thil man, Rs. 3,30,100 hu chu Pu K.Lalrinliana, Minister of State, Food, Civil Supplies & Consumer Affairs chuan a tih ralna hun a hmanpui a. Pu C.Liankunga, Vice President-in hun kaihruaiin NGO hrang hrang hruaitute an tel a ni.


Minister Pu K.Lalrinliana chuan ruihtheih thil chuan Mizoram hmun hrang hranga chhungkuaah buaina a thlen nasat thu sawiin mihring hmasawnna daltu leh tithuanawmptu a nih thu a sawi a. Heng harsatnate tih rem anih theih nan Sawrkar chuan zu khapna dan a kenkawh thu leh hemi kawnga hmalakna tichak tur a YMA-te nen thawhhona tha tak a awm thin chu lawmawm a tih thu a sawi. Ruihtheih thil chu ram leh hnam hmelma a nih angin a zuartute tan harsatna engmah chhuanlam a tlin loh thu a sawi. Minister chuan ruihtheih thil dap leh man chhuahna kawnga YMA hnathawh chu ropui a tih thu leh an hnathawh chhunzawmna kawnga a tul apianga hman tur Rs. 70,000 a pe bawk a ni.

Pu John LT Sanga, Deputy Commissioner pawhin thu sawiin India ram pum a ruihtheih thil hman sual tamna district 272 thlan chhuah zingah Kolasib chu a tel thu leh ruihhlo that lohna inzirtir tur a hmalakna ‘Nasha Mukt Bharat Campaign’ pawh kalpui tan a nih mek thu a tarlang a. Ruihtheih thil dona kawnga hmalakna chu mi tin mawhphurhna a nih thu a sawi bawk a ni.

Pu Lalremsiama Varte, Secretary, Kumpuan Sub-Committee tarlan danin vawiina ruihtheih thil tih ral te hi No. 4 hawng 1 leh Bagha Cap 350, Ganja kg 2 leh packet te 58, Yeast Gram 500, Beer can 44 leh sap zu case 15 a ni a, Rs. 3,30,100 bawr vel anga chhut a ni.

Attachment

  • Loading attachment...