1323/2022-2023
Aizawl the 22nd July, 2022 : Vawiin khan Agriculture Minister Pu C. Lalrinsanga chuan State Agricultural Management and Extension Training Institute (SAMETI) Conference hall-ah Agri-clinics and Agri-business Centres (AB & ABC) Scheme hnuaia ni 45 training, SAMETI, Mizoram leh National Institute of Agriculture Extension Management (MANAGE), Hyderabad tangkawpin an buatsaih kharna hun a hmang.

Agriculture Minister Pu C. Lalrinsanga chuan thu sawiin thalai lehkhathiam training tura lo pen chhuak te chungah lawmthu sawiin, ni 45 training chu mi 23 zingah mi 21 ten training hlawhtling taka an zo chu chhuanawm a ti a. Harsatna avanga zo theilo mi 2 te pawh hun remchang-a training leh turin duhsakna a hlan nghal a ni. Kan ram hi Bangladesh leh Myanmar ten kar chehin, kan awmna kil hle mah se, agriculture hmanga tharchhuah hmundanga market demand awm te thawnchhuah tumin, hmasawn zel kan tum tur a ni, a ti a. Minister chuan India ramah agriculture sector in bung thar kaiin Digital Agriculture Mission kalpui turin hmachhawp tam tak a awm a ni a ti a. Mizoram pawhin hmasawnna hmu zelin bacteria hmanga leitha siamna bakah Biocontrol Laboratory neih nan ruahmanna a kal zel a ni a ti bawk a ni. Minister chuan vawiin a training chhuak te hlawhtlinna chu an entrepreneur skill-ah thui tak innghatin, thil thar duanchhuah kawngah sulsu tu ni zel turin a ngenin an kal zelna turah duhsakna a hlan a ni.

Training ni 45 chhungin theory leh practical class ni 20 neih a ni a, field visit ni 5, assignment atan ni 11 hman a ni a, DPR Preparation and Submission atan ni 8 neih a ni a, Veledictory ni 1 neih a ni bawk a ni. Field visit-ah hian Mizoram Univerisity, Industrial hmun hrang hrang tlawh leh, Entrepreneurs te nena inkawmna hun hman a ni a. DPR 18 chu sector hrang hrangah thenin- Agriculture, AH & Vety, Horticulture Sector, Agri Clinic, IFS, PHT leh Vermi Compost Production ah te pawm a ni.

He hun hi SAMETI Director Pu J. Rothanga’n kaihruaiin, Course Co-ordinator Dr B.Lalrosiami Khuhly hnen atangin technical report ngaihthlak a ni a, Trainee te hnen atangin thusawi tawi ngaihthlak a nib awk a. Agriculture Director Pu James Lalsiamliana’n trainee te fuihna thu tawi a sawi bawk a ni.

Agri-clinics and Agri-business Centres (AB & ABC) Scheme hnuaia training hi hun remchang hmasa ber a buatsaih leh tum a ni.