1324/2022-2023
Aizawl the 22nd July, 2022 : Vawiin khan LADC Conference Hall ah CSR Programme hman a ni.

CSR hlanna inkhawm hi Pu Joseph Lalremruata, Chief Manager MRB Lawngtlai Branch in kaihruaiin kalkhawmte lawmna thutawi a sawi a. Mizoram Rural Bank atangin Pu Samuel L. Warbah, MRB General Manager, Network - II, leh Pu V. Ramhmangaiha, Chief Manager, MRB Lawngtlai Chanmari Branch ten thu an sawi bawk.

Pu V. Zirsanga, CEM, LADC pawhin thusawina hun a hman bakah Lai Autonomous District Council aiawhin Truck mounted Suction Machine, bawlhhlawh paihna atana hman tur Motor hi MRB General Manager in a hlan a ni.

Hemi rual hian Mizoram Rural Bank chuan District tina an Branch kaltlanga thlanbik khua (Model Village) - a CSR an pek kal zelah Paithar Model Village chu Bolero Pik Up an hlan nghal bawk a. Paithar khaw aiawhin Pu Lalrinthanga, VCP in a dawng.

He hun hmanpuitute zingah hian LADC a Chairman, Executive Member, LADC a officer pawimawh tak takte leh Journalist thenkhatte an kal tha hle a. Pi Esther Lalnunpuii, Manager (Financial Inclusion), MRB Head Office in lawmthu sawina in a khar a ni.

Mizoram Rural Bank hi Mizoram tana Bank din niin, tun dinhmunah hian Branch 100 a nei mek a. Thingtlang kilkhawr ber bera awmte pawhin Bank awlsam taka an dawr theihna turin theihtawp a chhuah mek a. Customer Service Point 236 a nei bawk. MRB kaltlang hian PM Schemes hrang hrang PMJJBY, PMSBY leh APY te tih theih reng a ni a. Loneitute, kuthnawktute bakah sawrkar hnathawkte tan pawh loan a pe chhuak mek reng a ni.