FCS&CA, E&F Minister Pu H. Rohluna chuan tun kar (19/8/2013-24/8/2013) chhung hian a bial, Lengteng Constituency fangin a tlawh kual.

He a bial fan na ah hian RMSA hnuaia cheng nuai 32.25 theuh a sak school building thar 3; Govt. Saichal H/S, Govt. Hliappui H/S leh Govt. Ngopa H/S; a hawng a. Heng school hawnna inkhawm hi Pu Hualrikhuma, Dy. DPC RMSA, Champhai District chuan kaihhruai in, School building sak dan tur nih phung te leh RMSA kalphung te a sawi a. RMSA in fund a pek te chu naupang tena hlawkna tam zawk an neih nan chauh a hmang turin school hotu te leh khawtlang hotu te a chah a. Pu. H. Rohluna, bialtu minister chuan, a bial chhungin hmasawnna duhawm tak a hmu chho zel chu lawmawm a tih thu a sawiin, school building tha leh hmunhma tha neih mai duhtawk lo a, thiamna tak tak char chhuak thei tur leh result tha tak nei thei turin zirlai te a fuih a. Zirtirtu te chu an naupang te thiamna ziktluak pe tur leh hlawhtlinna nei ngei tura chher turin a fuih bawk a. Tunlai inelna sang tak a ding chang thei turin zirlai bu a mi chauh ni lo thiamna leh hriatna pe theitu thildang te pawh hre tur leh zawng turin zirlai te leh zirtirtu te a chah nawn bawk.

Pu H. Rohluna chuan ram hmasawnna leh zir thiamna hi a kalkawp tlat a ni ti in, zirna in tha leh zirna tha a awm chuan ramin hma a sawn zel dawn a ni a ti. Heng school building tharah hian class room naupang 32 thut theihna 2, computer room (computer 10) 1, science laboratory 1, library 1 leh art & craft room 1 theuh a awm a ni. Saichal HS leh Hliappui HS  building thar hi 20/08/2013 a hawn ni in, Ngopa HS building thar hi a tuk 21/08/2013 ah hawn a ni.

Pu H. Rohluna chuan ni 21/08/2013 zingah Ngopa Open Tennis Tournament a hawng a. He Tournament hawnna inkhawm Ngopa BDO Pu Abrahama kaihruaiah hian bilatu minister chuan Ngopa chu Mizoram a tennis a a ber nihna an hauh thei chu lawmawm a tih thu sawiin, Mizoram mai ni lo ram pum huapah pawh lang thei tura tang tur in a fuih a. Tunah hian sorkar laipuiah DPR cheng nuai 1,240 Ngopa a Tennis Training Centre hawn a nih theihna tura thehluh a nih thu sawiin, a hlawhtlin ngei  a beisei  thu a sawi. Tennis khelthiam kalkhawm te chu ruihtheih thil laka fihlim a, thinlung thianghlim leh rilru leh tih tak zeta khel tur in a chah a.

He Tennis Tournament hi Mizoram pum huap niin, inelna category 4 ah then a ni a. Men’s single ah mi 24, boys under 16 ah  mi 32, veteran single ah mi 16 leh men’s double ah pair 10 tel turin an in ziak lut a ni. Tun dinhmunah hian Ngopa ah hian Tennis Court 3 a awm mek a ni. Hemi ni vek ni 21/08/2013 hian Minister chuan cheng 31,13,495/- senga sak Ngopa YMA Zawlbuk (Recreation Centre) chu a hawng bawk a.

He hawnna inkhawm Pu Robert C. Biakthansanga, Ngopa YMA President kaihhruaiah hian Minister chu Khuallian ni in, Pu Rolungmuana, SDC Aizawl DC Office, Ngopa BDO hlui chu Khualzahawm a ni. Bialtu minister chuan Zawlbuk tha tak, estimate tlem te a sak theih anih chu lawmawm a tih thu a sawiin, khawtlang mipui te tanrualna leh inpekna chu fakawm a tih thu a sawi a. Kalkhawm te chu zonun ze mawi vawng chung zela mahni hma zawn theuh a Mizoram thatna tur atana thawk tur leh thawk ho turin a sawm a ni. Ngopa khaw mi te tanrualna, khawtlang an hmangaihna leh inpekna avanga ram ro tling thil tha tak tak an nei chu bialtu minister chuan lawmawm leh chhuanawm a tih thu sawiin, khaw dang te tan pawh entawn tlak ni a ngaih thu a sawi bawk.

He YMA Zawlbuk hi BADP hnuaia sak niin, MLA Fund nen tangkawp a sak a ni a. Mi 140 thut len theihna a ni. A bial fan kual na ah hian bialtu minister chu khawtlang hruaitu ten lo kawm zelin an khawtlang duh leh mamawh te an lo thlen a ni. Bialtu minister chuan a bial chhung hmasawnna hmuh duhawm tak tak chu lawmawm a tih thu sawiin hma a sawn zel theih nan theih tawp chhuah a tum thu a sawi. Minister bial fan hi inrinni ni 24/08/2013 ah a tawp ang a, hemi ni hian Pawlrang HS building thar MLA Fund hnuaia sak chu a hawng ang.

Minister bial fanna ah hian a staff te bak ah, Pu Rolungmuana SDC(P), DC Office Aizawl, Pu Vanlalchuailova DFO(Champhai District), E&F Dept leh Pu C. Hualrikhuma, Dy.DPC RMSA Champhai ten Ngopa thleng an tawiawm a ni.