1096/2022-2023

Champhai, the 30th June, 2022: Remna Ni champhaphak vawi 36-na Champhai District-a lawmna pui ber chu vawiin chawhma dar 10:30 khan Kahrawt Community Hall-ah khuallian Food, Civil Supplies & Consumer Affairs (FCS&CA) Minister Pu K.Lalrinliana hovin hman a ni. He hun hi Health & Family Welfare Board Vice Chairman Dr. ZR Thiamsanga chuan khualzahawm niin a hmanpui bawk.

Khuallian Pu K. Lalrinliana chuan kalkhawmte chu Remna Ni pual chibai bukin buaina leh harsatna paltlang hmasak zet hnuah remna a awm thin a ni, a ti a. Remna neih a nih theih nana harsatna paltlang hrang hrang leh mipui inlungrualnate sawiin, harsatna namenlo tawrh laia remna siam kawnga thawktu political party, official, kohhran, tlawmngai pawl leh mithahnemngaite hmalakna fakawm a tih thu a sawi a. Remna a awm theih nan Pathianin hun tawn mil ang zelin rem a ruat thin thu tarlangin, kan zavaia remna kan duh tlan avangin remna kan nei chho ta a ni, a ti a. Remna awmzia hrechiangtu kalkhawmte chu thangtharte remna awmzia leh a hlutziate hrilhhre thin turin a chah a. Remna leh muanna hnuaiah chauh hmasawnna kawng zawh a mumal  theih thu leh hmasawn turin remna siam a tul thu a sawi a. Remna leh muanna hnuaia special category state nihna atanga hmasawnna ruhrel siamte leh remna thuthlung anga hmasawnna neihte a tarlang bawk.

Supply Minister chuan remna neih mek karah kan chhehvel atangin buaina leh harsatna thleng thei reng a nih avangin hnam intodelh ni tura tanlak a tul thu sawiin, huaisen turin intodelh a ngai a, hemi kawngah hian theihtawp chhuaha hmalak a tul a ni, a ti a. Remna leh muanna hnuaiah hmasawnna ruhrel tha leh tlo, ram leh hnam tana chhenfakawm tak siam kawngah tan kan lak sauh sauh a ngai a ni tiin, kalkhawmte chu remna leh muanna chu nitin nunah thu mai nilo a taka lantirtu nih tum turin a sawm a ni.

Thusawitu dang khualzahawm Dr. ZR Thiamsanga chuan Remna Ni chu zoram mipui mai nilo zohnahthlak zawng zawngte ta a nih thu leh kum 20 zet rambuaia awm hnua remna leh muanna neih a ni ta chu ngaihhlutawm a tih thu sawiin, hei hi khawvelin mizote a hriatphahna leh khawvel hmuha pholanna a ni, a ti a. Remna neih theihna kawnga tawrhna leh harsatna hrang hrangte tarlangin, ram leh hnam chhanchhuah nana martarte inpekna fakawm a tih thu leh hriatreng an nih tawh tur thu a sawi a. Mizoram chuan remna leh muanna vawnnun a nih chhunzawm zel theih nan theihtawp a chhuah zel dawn a ni, a ti a. Remna Ni chuan pawl leh pawl inkara innghirnghona awm thin tibo se, inremna leh inlungrualna thlen se a duh thu a sawi bawk.

Vawiin Remna Ni lawmna inkhawm hi Pu James Lalrinchhana, DC Champhai chuan kaihruaiin kalkhawmte lawmna thu a sawi a.  Pu Lalthamawia Bolchhim, Asst. Professor, Govt. Champhai College chuan Remna Ni tobul a sawifiah a. Pu F.Lalrinmuana, President, Sub-Hqrs.YMA Champhai hnen atangin thusawi ngaihthlak a ni bawk a. Pu Henry C.Lalrawnkima, Addl. DC Champhaiin lawmthu sawiin hun a khar a ni.

Remna Ni lawmnaah hian sawrkar department hotute, tlawmngai pawl aiawh, khawtlang hruaitute leh political party aiawhte an tel a ni.