1097/2022-2023
Saitual, the 30th June 2022: Vawiin khan Saitualah Remni Vawi 36-na lawmna inkhawm neih a ni a. He hun hi Govt.Saitual College-ah neih niin Agriculture Minister Pu C.Lalrinsanga chuan khuallian niin a hmanpui a ni.

Remna Ni lawmna inkhawm Saituala neihah hian Agriculture Minister Pu C.Lalrinsanga chuan Mizoram mipui zawng zawng duhsakna a hlan hmasa a. Remna Ni chu Zoram mipui ta a ni a, Party mal ta a ni lo a ni a ti a. He Remna ni a lo pian theihna atan an theihna zawng zawng, an thluak, an tha leh an nunna hial hlantute zawng zawng zahna chibai a buk bawk a ni.

Pu C.Lalrinsanga chuan Mizo Hnam Movement lo pian dan leh a tobul te a sawi a. Zalenna chu Hnam Sipai ten an sual ngei a, zalenna pawh an puang a. "Kan duh ber Independent Nation nei thei rih lo mah ila tunah hian he remna leh muanna hlu tak, Remna Ni kan hman hmasak ber atanga kan neih mek hi hmasawnna lungphumah kan hmang a, hmalam panin theihtawp chhuahin kan kal zel dawn a. Remna ni kan nei theihna kha hlawhtlinna nasa tak ni mahse kan tawpna a ni lo a. Economic independence kan sual leh mek a; state intodelh, a thenawmte kuta innghah ngai lo leh tanpui ngailoah kan state hi siam kan tum a ni", a ti.

Agriculture Minister chuan Pathianin tha, leilung tha tak bakah sik leh sa a tawk chiah min pe a. Agriculture leh Allied Sector bakah sector dangah te pawh theihtawp chhuah mek a ni a. Nakin lawkah chuan state intodelh - economically independent nih kan tum ber a la ni rih a ni a ti.

Bawrhsap Pu VL Hruaizela Khiangte hnen atangin Remna Ni lawm tura lo kal te lawmna thu leh thuhmahruai ngaithlak a ni a. Saitual District hmasawnna hrang hrang te he hunah hian a sawi lang a ni. Faina kawnga an hlawhtlinna te leh hmachhawp te a sawi a.Saitual District chhunga kawng pawimawh tak Mizoram leh Manipur inkalpawhna tur kawng siam mek chungchang leh hnathawh chin te a sawi a. Bawrhsap chuan District piangtir te ni mahse sawrkar hnathawkte leh mipui te lungrual taka thawhhona in rah tha a chhuah mek zel a ti a. District a hmalakna tichak turin department pawh dah belh mek zel a ni a. Tunah hian Department 20 chuang in office an hawng tawh tih a sawi a ni.

Saituala Remna Ni inkhawm hi Bawrhsap Pu VL Hruaizela Khiangte in a kaihruai a. Khuallian hnen atangin thusawi ngaihthlak a ni a. Pu Ramchhuanmawia, President, Saitual District Village Council Association pawhin thu a sawi a ni.

He hunah hian Pu J.Lalmuankima, Superintendent of Police, Saitual, District Head of Office te leh mi tlem a zawng sawm an ni a. Sawmbik te zingah India rampum huapa chawimawina dawng mi 4, Pu R.Lalthasiama, National leh State level a zirtirtu tha chawimawina dawngtu leh huaisen chawimawina dawngtute Pu Rualkhuma, Pu Lalremmawia Sailo leh Pu Martin Lalthamawia te pawh an tel a ni. Pu Andy Lalfakzuala Varte, SDO(S), Saitual in lawmthu sawiin huntawp a khar a ni.