1098/2022-2023

Aizawl the 30th June, 2022 : Vawiin khan E.Phaileng Buizova hall-ah Remna Ni vawi 36-na lawm a ni a, School Education Minister Pu Lalchhandama Ralte chuan khuallian niin a hmanpui.

Minister chuan Remna Ni hmannaah hian thusawiin ram buai avanga nunna chân te leh in leh lo chân te kha kan hre reng a, hnam pasalțha mual liam tawh leh nungdama la awm te zahna chibai kan buk a ni a ti. Minister chuan Mizoten remna kan vawn nun țhat avangin remna hi nunphung pangngaiah kan nei a, a hlutna leh a pawimawhna kan hrethiam ta mang lo tih sawiin remna hlutzia hi kan hriat thar leh a țul hle a ni a ti.

Minister chuan remna kan neih khan Mizote sakhua humhim turin India sorkar a intiam a, Mizote kristianna vawnhimna tur hi inremnaah bilh luh a ni te leh he ram neitu chu Mizote kan ni tih te ziah tel a ni a ti a. Heng bakah hian kan ram leh hnam tan thil pawimawh tak tak an lo ziak a ni a ti. He remna kan neih hlu em em hi mitinin kan mamawh a ni a ti a. Remna Ni lawmtute hian midang rem loh kan neih chuan ngaidama theihnghilh a, remna siam zel turin kal khawmte a sawm a ni.

E. Phailenga Remna Ni lawmnaah hian HSLC leh HSSLC pass tharte chawimawina thuziak chu Minister Pu Lalchhandama Ralte hian a hlan nghal a ni.

Remna Ni lawmnaah hian khawtlang hruaitute, party hruaitute, zirlaite leh khawtlang mipuite an kalkhawm a ni.

Attachment

  • Loading attachment...