1099/2022-2023
Dated Serchhip, the 30th June, 2022: Vawiin khan Remna Ni, 2022 lawmna inkhawm Serchhip BNRGSK Hall, P&E Veng, Serchhipah buatsaih a ni a. Deputy Speaker leh Tuikum Bialtu MLA ni bawk Er. Lalrinawma chu khuallian a ni.

Khuallian Er. Lalrinawma, chuan British hnuaia India ram a awm lai khan Mizoram chu mahnia ro inrelin min awm tira, India a lo zalen khan khatihlaia kan ram hruaitute khan ram an hmangaihna avangin engtia awmzui tur nge tih an ngaihtuah nasa em em a. A tawpah kum sawm dana ennawn leh thin turin Indiaa awm kha rem an tirih ta a. Kum engemawzat a lo veia ram hmangaihna avang bawkin India ram ata indan chhuah duhna a lo awm a, kan ramin khaw eng a hmuhna a nih dawn phawt chuan tiin mahni hrehawm pawisa lovin, thih ngamin zalenna an lo sual a, mi tam takin nunna an hlana, mi tam tak ramtuileilovin an awma, mahni vanglai hun tha ramhnuaiah hmang zovin, chhuan tam tak chawte an nghei a, an theih ang tawka sangin he ram tan hian an bei a, vawiinah hian khang mite kha zahna chibai kan buk a ni. Ram an hmangaihna avang zelin kan ramin hun harsa a paltlang lai khan mi hrang hrang, party hrang hrang leh kohhrante, tlawmngaipawlte nasa takin mahni zawnah kan bei a. Mipuite ngenna nasa tak avangin kum 1986 ah Remna kan lo nei ta a ni. He remna hi vawiin thlenga remna hlawhtlinga sawi hlawh a ni a, remna duangtu kan ram hruaituten fing tak leh hmathlir thui tak neia remna an ziah avangin hmasawnna duhawm tak tak kan neih phah chur chur a, keini ho tan malsawmna a lo chang ta. Hnam leh hnamzia leh sakhua humhimna dan tha takte, sum leh paia duhsaknate, University tha leh changtlung takte, High Court te leh thil dang tam tak kan nei chho ta a ni, a ti a. Buai lai hrehawmzia hre reng chungin remna hlutzia hi ngaihtuah thin ila, he remna chhawm nung zel tur hian theihtawp i chhuah zel ang u. Remna tel lo chuan hmasawnna a awm thei lova, kan ramin hma lam a pan zel theih nan remna leh muanna hi a pawimawh hmasa a ni. Tin, hmasawnna hi a vantla a awm lova, thawh chhuah a ni. Chuvang chu remna hnuaia hma kan sawn zel theih nan mitinin mahni zawn theuvah i thawk tauh tauh zel ang u, tiin remna vawnghim zel tur leh ram tana inpe turin in kal khawmte a chah a ni.

He hunah hian Pu Lalmuansanga Ralte, Serchhip bawrhsap mawhphurhna chelh mektu chuan thusawina neiin, remna hlutzia leh hmasawnna bul a nihzia a tarlang a. Remna Ni hmang tura kal khawm zawng zawngte chungah lawmthu a sawi bawk. Pu K. Vanlalpeka, Asst. Proffesor, Department of History, Govt. Serchhip College, chuan Remna Ni Chanchin leh Pawimawhna tih thupui hmangin thusawina a nei a, Pu PC Lianhnuna, Vice President, PAMRA, Serchhip leh Pu Kawlthuama, Chairman, NGO Coordination Committee ten thutawi sawina neiin, Sub Hqtrs YMA Zaipawl, Pi Laithangpuii leh Nl. F. Lalremruati ten zaiin kal khawmte an awi bawk a ni.

Inkhawm hi Pu K. Saitluanga, MIS, DIPRO, Serchhip in a kaihruai a, Lt. Vanlaltharzuala, CO, Salvation Army in hunserh hmangin, Pu Saidingliana Sailo, Addl. SP in lawmthu sawiin hun a khar a, Serchhip khawpui chhunga Head of Offices te, VC zawng zawng aiawh te, tlawmngaipawl hrang hrang aiawhte, Party hrang hrang aiawhte, kohhran hrang hrang aiawhte, PAMRA members te, Hnam sipaia lo tang tawh thin te leh Media mite an kal khawm a ni.