1100/2022-2023
Aizawl the 30th June, 2022: Vawiin khan Mizoram pumah Remna Ni puala hun hman a ni a. Aizawlah chuan Chief Minister Pu Zoramthanga hovin Vanapa Hall-ah hman a ni.

Chief Minister chuan Remna Ni thuchah a sawiah remna thuthlung hi "India sorkar duh ang taka siam a nilo, Mizoram mipui duh dam ang tak pawh a ni lo, ramhnuai sawrkar duh ang tak a duan pawh a nilo, mahse kan sirtluk a kan inrem theihna tur, Pathianin kan vaia kan pawm tlan theih inremna min pek a ni e," a ti. Remna nei tura hmalak chhung hi rei mahse a hlawhtlinna turin Pathianin engkim a chuktuah rem khawm vek a ni tiin, kawng hrang hranga remna Mizoramin a neih theih nan a mi hrang hrangin hma an lak dan te a sawi a ni. Chief Minister chuan he inremna ropuina chhan pakhat chu ram danpui a chuang, Mizoram humhalhna tur hlu tak a ken vang a nih thu a sawi a. Article 371G hnuaia inziak chu party pahnih te'n sacrifice siam ve ve chunga inremna an ziah avanga lo piang a nih avangin thuneitu pakhatin in a duh ang anga a siam, a duha a hnuh let leh mai mai theih thil a nih loh thu a sawi.

Pu Zoramthanga chuan Remna Ni champha phak 36 naah hian remna tluangtling a nih zia a lang chiang zel a ni, a ti a. A kalkawng pawh a hahthlak thu sawiin, Zoram remna hi State dang leh ram dang mite pawhin an awh thu a sawi a. Thenawm state ah te pawh inremna thuthlung ziah hriat tur awm thin mahse harsatna an tawh zui leh thin thu sawiin, Mizoramah chuan inremna ziah hnu ah Zoram buai siamtu an awm tawhlo a ni, a ti. Chief Minister chuan Mizoram hian khawl thilsiam lian tak tak thawnchhuah tur neilo mah ila, export tur kan neih miin an duh ber chu Zoramin remna kan neih ang hi a nih thu a sawi a. A hmanna tur dik takah hmangin, remna siam tuah Zoram mipuite hi tang a, remna hna thawktu kan nih a duh thu sawiin, chu chu Pathianin remna min siam sak chhan pawh a ni ngei ang, a ti a. Vawiina Remna Ni pual hian mipui pawhin he remna hlut zia hi hrechhuak thar a, vang him tlat a, midang hnena remna chanchin tha puangtu nih tum theih turin mipui a sawm a ni.

Vanapa Hall-a Remna Ni program buatsaih hi Pu Navin Kumar Choudhary, Chief Secretary chuan kaihruaiin kalkhawmte lawmna thu a sawi a. Remna leh muanna atana nunna chan ta te zahna lan tir na hun hman niin, Remna Ni documentary DC Aizawl, DIPR, Art & Culture leh ICT department thawkho buatsaih chu thlirho a ni bawk a. NGO Coordination Committee Member Pu Lalhmachhuana leh MKHC Chairman Rev. Dr. Vanlalnghaka Ralte hnen atanga thusawi ngaihthlak a ni bawk.

Ram hruaitu leh sawrkara hotu pawimawh te, kohhran leh tlawmngai pawl aiawhte vawiin hunah hian an tel a ni.