1101/2022-2023
Kolasib dated 30th June 2022: Tukin khan Dr.R.Lalthangliana, Minister, Health & Family Welfare Department chuan NABARD sum hmang a sak,'Primary Health Centre, Bilkhawthlir' a hawng a. Dr. T.Lalhmangaihi, Principal Director, Health & Family Welfare Department chuan hun kaihruaiin Pu Lalrinsanga Ralte, MLA, Serlui Assembly constituency, Vice Chairman, Rubber and Allied Crops Development Board leh Health & Family Welfare Department-a hotute an tel bawk a ni.

Dr.R.Lalthangliana, Minister, Health & Family Welfare Department chuan Primary Health Centre, Bilkhawthlir hawn theih a buatsaih a ni chu lawmawm a tih thu sawiin PHC sak puitlin nana thawktu inpe zo tak tak an awm chu fakawm a tih thu a sawi a. Serlui Assembly Constituency chu Mizoram luhkapui a nih angin hriselna kawngah hmanrua leh thawktute pawh tihchangtlun zel a pawimawh thu leh thawktute pawhin mipui tan a rawngbawlna rilru puchunga hna an thawh a tul thu a sawi. 14th Conference of Central Council of Health & Family Welfare (CCHFW), Gujarat-a May 2022-a neih ah India State hrang hrang Health Minister kalkhawmte hma ah mipui hriselna kawng a mi thawh hlawk tak, Saipum khua Pi Lalhlunchhungi, Health Worker chanchin a phochhuah thu a sawi bawk a ni.

Health Minister chuan Serlui bial a Health Sub-Centre awm zawng zawngte chu Health & Wellness Centre-ah hlan kai vek tawh a nih thu tarlangin Vairengte Community Health Centre pawh tih changtlun chhoh zel tum a nih thu a sawi a. Sawrkarin hmasawnna kalpui tur a ruahmanna hrang hrang hmachhawp a neih te chu hripui leng avangte leh harsatna dang avangtein tum anga kalpui theih a nih loh thu sawiin Health & family Welfare Department hnuai a thawktu indaihlohna avanga harsatna sukiang tur a hnaruak lak tur a ruahman tam tak pawh beisei angin hnawhkhah a la nih loh thu a sawi. Dr. R.Lalthangliana chuan mipui hrisel zawk nan Health Department chu tha lehzual a thawmthat a nih mek thu sawiin Aizawl Civil hospital-ah, NICU chhiar telin khum 30 bawr vel leh ZMC-ah 70 bawr vel a awm tawh thu te leh ZMC-ah dam lo enkawlna khum pawh 300 chuang a awm thu a sawi a, Cancer Hospital changtlung tak Zemabawkah, Japan International Cooperation Agency-te nen tangkawpin sak tum mek a nih thu leh kum 2028-a zawh hman beisei a nih thu a sawi bawk a ni.

Dr.R.Lalthangliana chuan Kalyakalp hnuai ah Hospital, CHC leh PHC chu faina leh thianghlimna kawngah inelna an buatsaih thin thu tarlangin faina mai piah lamah mahni bial chhung theuh a mipuite hriselna enkawl kawnga hnathawk tha pawh endik a, lawmman te buatsaih a nih theih nan ruahmanna a awm thu a sawi. NESIDS hnuai ah Kolasib district Hospital pawh khum 100 awm theihna ah siam tum mek a nih thu Health Minister chuan tarlangin heng hmalakna hian Kolasib district mipuite hriselna kawngah hmuh theih khawp a hmasawnna a thlen thuai a beisei thu a sawi bawk a ni.
Pu Lalrinsanga Ralte, MLA, Vice Chairman, Rubber & Allied Crop Development Board pawhin thu sawiin Serlui Assembly Bial chhunga Health Clinic hawn tharah te mipui hriselna endik hna chak zawk a kalpui a nih theih nan mi 7 MLA fund hmang a chhawr mek a nih thu a tarlang a. Mizoram luhkapui awmna leh State thenawmte nen a inrina thui tak awmna Serlui bial chu kawng engkima thawmthat a pawimawh thu sawiin PHC, Bilkhawthlir thar hawn a ni ta chu lawmawm a tih thu a sawi.

Dr.Vanlalsawma, Joint Director of Health Services tarlan danin Bilkhawthlir Primary Health Centre chu NABARD RIDF XXV hnuai a sum cheng Nuai 225.58 hmang a sak a ni a, Zozam Engineering Construction & Consultancy, Aizawl sak a ni. Ni 9, September, 2020 a sak tan niin ni 23, November, 2021 khan sak zawh a ni a, kawngan 235 Sqm leh chhawng khatna 235 Sqm a zau bakah a chung zawlah room Sqm 40 a zau a awm bawk a ni. Kawngan ah hian X-Ray room, Casualty, Pharmacy, Laboratory, OPD, Office leh Operation Theatre a awm a, chhawng khatna ah hian Labour Room, Induction, Male & Female Ward leh Nursing station-a awm bawk a ni. PHC, Bilkhawthlira X-Ray khawl bun tur a hmalak mek a ni a, a tul ang angte bawk zui mek niin July 2022 hian hman tan theih tur a tih nun hman beisei a nih thu Joint Director hian a tarlang bawk a ni.

Mizoram chhung a National Health Mission hnuai a hmalakna hrang hrang tarlanna hun Dr. Eric Zomawia, Mission Director, NHM chuan sawiin Dr.Lalawmpui Chhangte, CMO, Kolasibin lawmthu sawina hun a hmang bawk a ni.