1102/2022-2023
Lunglei, the 30th June, 2022: Remna Ni champhaphak vawi 36-na Lunglei District-a lawmna pui ber chu vawiin chawhma dar 10:00 khan Convention Centre-ah khuallian Mizoram Youth Commission (MYC) Chairman Dr Vanlaltanpuia hovin hman a ni.

Dr Vanlaltanpuia chuan kalkhawmte chu Remna Ni chibai bukin Remna leh Muanna kan neih theihna tura ram tana inpe hnam sipai leh martarte zahna chibai a buk a. India rama State ralmuang ber ti a sawi fo thin kan ni ta hi a ropui takzet a ni tiin Remna kan neih theih nana Mizo mipui leh hruaitu hmasa te lo inpekna leh thawhrimna te kan chawimawia kan ngaihhlut thiam a tul takzet a ni, a ti a. Khawvel pum huap pawha remna thutlung hlawhtling berte zinga mi Mizoram Accord, 1986: Memorandum of Settlement chuan remna leh muanna a thlen mai bakah Mizoram tana hmasawnna pawimawh tak tak – University changtlung tak Mizoram University, leh Mizoram High Court ruahman mek te kan neih theih phah hi a ropui takzet a ni, a ti bawk.

Remna Ni champhaphak vawi 36-na kan han thlen takah chuan engtin nge kan hmasawn zel anga, eng kawngah te nge tan kan lak a tul tih hi Zoram mipuiten kan ngaihtuah tlan a, hma kan lak a tul a ni, a ti a. Kan ram leh hnam a hmasawn zelna turin kan thalaite kan kaihhruaia, kawng kan kawhhmuh a tul hle a ni tiin Mizo thalaite hmasawnna turin MYC chuan theihtawp a chhuah zel dawn a ni, a ti a. Vision IAS, Delhi nen tangkawpin Super IAS 40 chu ruahman leh niin naktukah result puan anih tur thu MYC Chairman chuan a sawi a. He Super IAS 40 a tlingte hi Delhi-a coaching an kalna tur fee te leh Delhi an panna tur leh an hostel fee te tum sak vek an nih tur thu sawiin he hmalakna kaltlang hian kan Mizo thlalaite All India Service ah an tlin ngei a beisei thu a sawi a ni.

Vawiin program-ah hian Rev R. Lalbiakliana, General Secretary, BCM chuan hunserh a hmang a. Lunglei DC Pu Kulothungan A, Pu LH Rothanga, Principal, Lunglei Government College leh President, Lunglei District VC Association ten thu sawiin Lunglei SP Pu Rex Zarzoliana Vanchhawng chuan lawmthu sawina hun a hmang a ni.

Sub Headquarters YMA Zaipawl te chuan hla remin Venglai YMA Cultural Sub Committee te chuan Cheraw an kan a ni.

Vawiin program-ah hian Lunglei District-a head of office-te, tlawmngai pawl hrang hrang leh khawtlang hruaitute an tel a ni