Vawiin khan Food, Civil Supply & Consumer Affairs Minister Pu K.Lalrinliana hovin ama office chamber-ah ‘Cable TV Digitalisation Fee’ chungchangah hemi kaihhnawih sorkar department officials bakah Mizoram Consumers’ Union leh Cable Telelvision Operators aiawhte nen meeting pawimawh tak an nei.

FCS&CA Minister Pu K.Lalrinliana chuan sorkar laipuia Telecom Regulatory Authority of India (TRAI)-in February ni 1, 2019 atanga Cable TV leh DTH Operator zawng zawngte chu digitalisation ti vek tur leh an consumer-te hnen atanga fee an khawn dan tur Dan thar an ruahman te chu hman vek tura hriattir a nih takah chuan Mizoramah pawh engemaw chen nghawng a nei chho zel a, mipuiten an chanvo dik leh tha ber an chan theih nan hmalak zel pawh tum a ni, a ti. TRAI ruahmanna tharte chu a rang leh dik thei ang ber, mipuite tana phurrit engmah siam belh chuang lova kalpui a nih theih nan sorkar leh Consumers’ Union leh Cable TV/DTH Operator te pawhin thawhhona tha leh langtlang an nei a, mipuite tan theihtawp chhuah turin Minister chuan a hrilh a ni.

Vawiin meeting-ah hian Consumers’ Union President Pu Chawngsailova’n TRAI dan tharte tarlangin Mizoramah a dik theih ang bera hman nise an duh thu a sawi a. LPS leh ZONET Cable TV aiawhten Mizorama an hmalak tawhna leh hmalak mekte an tarlang bawk a ni.