Vawiin khan Lunglei East bialtu MLA leh Lunglei HPC Vice Chairman ni bawk Pu Lawmawma Tochhawng hovin sawrkar hotute leh khawtlang hruaituten Lunglei Ramthar leh Farm Venga kawngpui leh tuihawk luankawr siam that ngai leh hmasawnna hna tul dangte a hmunah kalin an enfiah.

HPC Vice Chairman Pu Lawmawma Tochhawng ho hian Nghasih thleng kalin helai hmun panna kawng siam dan tur leh Nghasih zau loneitute harsatna tawhte a hmunah an enfiah a. Pu Lawmawma Tochhawng chuan Nghasih kawng siam mek chu Lunglei mipuite leh helaia loneitute tan a pawimawh takzet a ni tiin kawng tlo leh tha siam turin Department hotute chu a chah a. Nghasih lui fintu Khuai lui bridge pawh a rang thei ang bera thuam that tul a tih thu  sawiin PWD hotute nen hmalak dan tur an sawiho. Nghasih zau hmasawnna turin Agriculture leh Department dang hotu te nen tangkawpa hmalak a tum thu a tarlang bawk.

Vawiina culvert leh side drain bakah kawngpui siamthat ngai te hi PWD Department bakah HPC atanga siam tura ruahman an ni a, PWD Lunglei hotute chuan a siam that dan tur ruahmanna a hma thei ang bera peih an tum thu an sawi. HPC Vice Chairman hi PWD (Lunglei Division) EE Er Samuel Ramdinthara, SDO Er.HC.Zirliana, DIPRO Pi C. Lalremruati, Lunglei MJA hruaitute, leh party hruaituten an tawiawm a ni.