No.2727/2021-2022
Aizawl, 26th October, 2021 : Vawiin khan Food Civil Supplies and Consumer Affairs (FCS&CA) Minister Pu K.Lalrinliana chuan a pisaa programme tawi buatsaihah Consumer Protection Act, 2019 Mizo tawnga lehlin a tlangzarh.

Minister Pu K.Lalrinliana chuan Mizoram Consumer Union leh FCS&CA Department te thawhhona avanga Consumer Protection Act, 2019 Mizo tawng ngeia chhiar theih tura dah a ni ta chu lawmawm a ti a. Mipui mimir, consumer te dikna chanvo humhalhna kawngah nasa takin a tangkai thei dawn tih sawiin ram leh mipuite tan a la hlu dawn chauh a ni, a ti. Thil man dik tak leh buk dika bithliah mai piah lamah mipuiten thil tha, quality tha an lei tur a ni, tih hi kan rilru ah kan dah reng tur a ni, Minister chuan a ti a. Thil leitu mipuiten dan tlawhchhana huaisen taka an dikna chanvo an humhalh theihna turin he CPA, 2019 Mizo tawnga a bu siam chhuah tak hi mipui (consumer)-ten an hriat chian a tul a, an chhiar tam pawh a tul a ni, a ti bawk.

Consumer Protection Act, 2019 letlingtu Prof. Chawngsailova, President, Mizoram Consumer Union chuan a bu chhung thu tlangpui a sawi a. Consumer Act, 1986 chu kum 2019 ah thiah niin he dan thar hian a thlak ta hlawk a. Consumer te tawng chhan ber, Consumer Disputes Redressal Forum, District Forum chu thuneihna sang zawk neiin he dan thar hian Consumer Disputes Redressal Commission, District Commission tiin a thlak a. Cheng nuai 20 atangin cheng vaibelchhe khat thleng thubuai khawih theihna thuneihna a nei ta a. Consumer Commission in order a tihchuah zawm lo chu thla 6 thleng lung in tan leh cheng nuai 20 thleng chawi tir thei turin thuneihna a pe a. Court kal kher ngai loa thubuai sawi rem theihna tur Mediation Cell a siam bawk a ni.

Vawiin programme hi FCS&CA Secretary Pu Zothanmawia’n a kaihruai a. Pi Ramdinliani, Director, FCS&CA chuan lawmthu sawiin hun hnung a khar a ni.