No.2726/2021-2022
Aizawl, 26th October, 2021 : Dr P.L. Ramliana, Secretary, Mizoram Scholarship Board chuan Post-Matric Scholarship chungchanga harsatna tawh mek sawifiahna a hnuaia tarlan ang hian thuchhuah a siam :

Mizoram Scholarship Board kaltlang a sem thin Tribal Scholarship hi Ministry of Tribal Afffairs in Scheduled Tribe zirlai mi harsate hnena a pek thin a ni a. Mizoram sawrkar chuan Central a Ministry in a pek vek hnu ah za a sawm (10%) a tum ve chauh thin a ni. Ministry of Tribal Affairs in Scholarship a pekte hi Pre-Matric leh Post-Matric Scholarship te an ni. Tichuan he Scholarship hi a pe tu tak chu Central sawrkar a Ministry of Tribal Affairs a ni.

A diltu zirlai te dilna endik vek a nih hnu ah kum tin he scholarship hi pek an ni thin a. Central sawrkar in a rawn pek ang zelin Mizoram sawrkar pawhin tikhawtlai lovin a pe chhuak leh thin a ni.

Kum 2020-21 atana Post-Matric Scholarship tur hi zirlai 15,828 te hnen ah Central sawrkar in a pek tawh angin sem chhuah leh vek tawh a ni. Amaherawh chu hemi kum veka zirlai 17,970 te erawh chuan Central sawrkarin a la release belh leh loh avangin an la dawng ve thei lo a ni. Hemi chungchangah hian H&TE Minister Dr R.Lalthangliana pawhin chak taka hma la in Ministry of Tribal Affairs ah D.O letter te thawn in telephone in a be tawh bawk a. Hetiang a nih avang hian Ministry of Tribal Affairs Secretariat-a thawktute pawhin Mizoram harsatna hi an hrethiam tawh hle a. Zirlaite pawhin kan Minister hmalakna avang hian scholarship an la hmuh ngei a beiseiawm hle a ni.