672/2023-2024

Kolasib dated 3rd June 2023: Tukin khan Pu K.Lalrinliana, Minister, Food, Civil Supplies & Consumer Affairs Department changtu chuan Health Clinic, Electric Veng, Kolasibah a hawng a. Pu R.Lalsiamliana, President, Village Council, Electric Veng chuan hun kaihruaiin Dr. RK Lalthlamuana, Senior Medical Officer leh Electric veng a tlawmngai pawl hrang hrang hruaitute an tel a ni.

Minister Pu K.Lalrinliana chuan khawtlang hmasawnna tur chuan rilru leh taksa hrisel neih a pawimawh thu sawiin chumi tur chuan Kolasib khaw chhung leh khaw pawn hmun hrang hrangah Health Clinic engemaw zah hawn a nih tawh thu a sawi a. District Hospital, Community Health Centre leh Primary Health Centre-ten mipui hriselna an enkawlna kawng a chhawk zangkhaitu leh tichaktu hmanraw pawimawh tak ni turin heng Health Clinic hawn thar te hi khawtlangin an chhawr thiam a pawimawh thu a sawi. Minister chuan kan ram intodelhna tur chuan thalaiten thiamthil eizawnna tlak leh tangkai an neih a ṭul thu te, kut hnathawh zahpui loh leh uar zel tur a intihhmuh a pawimawh thu sawiin hnam dang hna thawh hreh nei lote chuan kan ram chhung ah kut hna thawk a eizawng ṭhahnem tak an awm mek thu a sawi. Pu K.Lalrinliana chuan Mizoram chu hmun hrang hrang a zohnahthlak ten harsatna leh buaina avangin inpui anga ngaiin an belh mek thu a sawi a. A chhunga chengte hian heng kan unaute hi lo tuamhlawm leh kan phak ang tawk a lo ṭanpui hi kan mawhphurna a nih thu sawiin inunauna ṭha leh insuihkhawm duhna thinlungpu chung a thawhona chuan hnam zahawm tak a min siam theih thu a sawi bawk a ni.

Dr. RK Lalthlamuana, Senior Medical Officer chuan Kolasib district chhung hmun hrang hrang a Health Clinic din a ni chu lawmawm a tih thu sawiin Health Clinic-ah hian inenkawlna hmunpui pan ngai lo a hriselna endikna (Test) leh vaccine pek te an kalpui ṭhin tur thu a sawi a. Hei hian khawtlang hriselna kawng a hmasawnna thlentu a nih ngei a beisei thu leh khawtlang pawhin neitu nihna thinlungpu chung a enkawl zui turin a chah bawk a ni.