673/2023-2024

Dated Serchhip, the 3rd June, 2023: Vawiin khan Serchhip Kawlri tlanga Social Welfare Depapartment in an buatsaih 'Observation Home' chu Er. Lalrinawma, Minsiter, Social Welfare & Tribal Affairs etc., chuan a hawng a, Eklavya Model Residential School a tlawh bawk.

Minister chuan, Serchhip Kawlri Tlanga Obsevation Home hawn thar a ni chu lawmawm a tih rualin hmang tangkai tur awm tam lo se a duh thu a sawi a, Obsevation Home lo awmna chhan ber chhungkaw kehchhiatna leh nupa inthenna te hi tlem deuh deuh se a duh tak zet thu a tarlang a ni. Amaherawh chu hetia Observation Home a lo awm tak siah chuan a mamawhtuten tangkai takin hmang ngei thei se a duh thu a sawi bawk.

A hawnna inkhawmah hian Pu Lalthankima,  Assistant Engineer, SW&TA, chuan Technical report a pe a, Rs. 87,45,000 senga sak Serchhip Kawlri Tlanga Obsevation Home hi kum 2022 April khan sak tan niin, kumin 2023 April thla khan zawh fel a ni a. Building pahnih Main Building Rs. 55,82,953 senga sak leh Superintendent Office building Rs. 31,62,047 senga sakte awmin Deparmental Work-a sak a ni. Main building hi Floor 1 niin, 173.92 sq.m a zau a ni a,  Superintendent Office Building hi 108.10 sq.m a zau a ni thung a, a vaiin Home Building hi 282.02 sq.m a zau a ni.

Pi Zoramthangi Chhangte, Director, WCD pawhin thusawiin, Social Welfare &Tribal Affairs Department hnuaia peng hrang hrangte inthendarh dante a sawifiahin Serchhip Observation Home chungchang pawh a sawifiah a. Naupang kum 18 la tlinglo, dan kalha che mi 25 enkawl theihna tura duan a nih thu leh hetiang Observation Home hi kum 2016 atanga Serchhipa din tan a nih thu a sawi a, Mission Vatsalya hnuaiah Women & Child Development, Social Welfare & Tribal Affairs Department in a enkawl a, Principal Magistrate kaihhruaina hnuaiah Juvenile Justice Board (JJB) ten home a awm naupangte chungchang hi an ngaihtuah thin a, a tul  dan a zirin home dangah pawh an refer thin thute a sawi a ni. He Home-ah hian thawktu Superintendent hovin mi 10 an awm a, Home a awm naupangte chuan nunphung pangngai an zawh leh theihna turin, zirtirna chi hrang hrang bakah intihlimna leh infiamna chi hrang hrang pek thin an ni. Devotion mumal taka neihpui thin an nih bakah an hriselna dinhmun te uluka endik thin niin, an lo puitlin huna an eizawnna tur inbuatsaih nan thiam thil inzirtirna- Vocational Training te an neihpui thin an ni.

Serchhip Observation Home hawnna  inkhawm hi Pi Nazuk Kumar, Deputy Commissioner, Serchhip District chuan a kaihruai a, Pi Sailopari, Deputy Director,Women & Child Development in lawmthu sawiin Programme hi a khar a ni.

Minister hian Observation Home a hawn zawh hian Serchhip En Tlanga Eklavya Model Residential School chu a tlawh leh a, School Chapel ah Principal Pu Vanlalruata leh a thawhpuite leh zirlai naupangte nena inkawm hona neiin, hma an sawnna tura an mamawh hrang hrangte a ngaihthlak sak a. Fuihna thu a sawi bawk.