674/2023-2024

Champhai, the 3rd June, 2023: Chief Secretary Dr. Renu Sharma IAS chuan vawiin khan Champhai leh a chhehvela Sawrkar hmalaknate tlawhin a enfiah.

Chief Secretary chuan Champhai a cham chhunga Official-te lo dawnsawnna leh ruahmanna siam bakah hmunhma hrang hrang a tlawhnaa thawktute dawnsawnnaah lawmthu a sawi a. Sawrkar leh pawl anga hmalakna hrang hranga bawhzui ngai leh Sawrkar anga umzui tulte pawh ngaihtuah zui tum a ni, a ti a. Sawkar hmalakna project pawimawh tak takte a nihna ang tur taka chhawr tangkai a tul thu sawiin, a hun taka zawhfel mai bakah hna tlo leh tha, ram tana rotling ni ngei tura siam a pawimawh thu a sawi bawk.

Dr. Renu Sharma hian tukin dar 9:30 khan PHE Department kaltlanga Non Lapsable Central Pool of Resources, NLCPR (DoNER) sum cheng vaibelchhe 19.88 senga siam Keilungliah tuikhuah, April ni 1, 2023 a Union Home Minister-in a hawn chu tlawhin a enfiah a. He hunah hian Keilungliah tuikhuah enkawl tura Sawrkarin a din, District Level Committee on Post Completion Management & Maintenance of Dam Reservoir cum Recreation Centre at Keilungliah hmalaknate hrilhfiah a ni a. UD&PA Department hnuaia hnawm sakhat sawngbawlna Solid Waste Management Centre (SWMC), Mualkawia kalpui mek pawh tlawh bawkin hmalak tawh chinte a enfiah a, hmabak la awm angte thawh chhunzawm thuai a nih theih nan fund pek chhuah leh tur chungchanga tulte pawh pawh a bawhzui nghal bawk a ni.

Hemi hnu hian Zokhawthar khua tlawhin Land Customs Station (LCS), Immigration Check Post (ICP) leh 42nd Assam Rifles COB te a tlawh a, hmalaknate enfiahin thawktute a kawm a. Special Assistance to State for Capital Investment (SASCI) sum cheng vaibelchhe 15 senga Zokhawthar Land Customs Station tihchangtlun hna kalpui mek pawh a enfiah bawk a. Heng bakah hian Pradhan Mantri Awas Yojana-Gramin (PMAY-G) hnuaia insak tanpuina dawngtu leh Zokhawthar Fair Price Shop-te tlawhin an  hmalak dante a enfiah nghal bawk.

Chief Secretary Dr. Renu Sharma hi Champhai District Bawrhsap Pu James Lalrinchhana, SP Pu Lalrinpuia Varte leh Official dangte'n an tawiawm a. Vawiin chawhnu khan Aizawl panin a let leh a ni.