No.3228/2021-2022

Aizawl dated 1st December 2021: Vawiin khan Pu K.Lalrinliana, Food, Civil Supplies & Consumer Affairs Department Minister, Kolasib Assembly Constituency bialtu MLA ni bawk chuan Kolasib khaw chhunga MLA-LADS hmanga hmalakna thenkhat a endik a, 2022 KTP General Conference thlenna tura ruahman Diakkawn Field-a inbuatsaihna kalpui dan tur a enpui bawk a ni.


Kolasib district-a kal tha lo leh natna dang vanga Dialysis tih ngaite tan Aizawl pan zel a ngaih thin thu Minister Pu K.Lalrinliana chuan sawiin hei hian dam lote tan veivahna leh inenkawlna kawng thlengin harsatna a thlen phah thin thu a sawi. MLA-LADS hmanga District Hospital, Kolasiba Dialysis Room sak mek chu tlawhin peihfel a nih hunah chuan Kolasib district mipuiten tangkai taka an hman a beisei thu a sawi a, Dialysis tih ngai dam lote harsatna nasa takin a sutkian ngei a rin thu a sawi bawk a ni. Dialysis Room-ah hian khawl pahnih dah theih tura ruahman niin peihfel hunah chuan nikhatah mi panga vel dialysis ti thei tura ngaih a ni.


Supply Minister hian 2022 KTP General Conference nghahna tura buatsaih Diakkawn Field a tlawh a, a panna motor kawng leh kea kalna step thawmthat dan turte, a hmunhma chei dan turte leh tui lakluh dan turte a enpui a. He hunah hian 2022 KTP General Conference Organising Committee-te leh Sawrkar department hrang hrang hotute an tel a, hmalak ho dan turte sawi a ni.


Pu K.Lalrinliana hian MLA-LADS hmanga sak Community Hall, Project Venga hna kalpui dan endikin Diakkawn Bazaar thawmthat dan tur khawtlang hruaitute nen an enho a, RMSA, Saidan building sak dan tur thawktute nen an enho bawk a ni. Dr.H.Lalthlangliana, Deputy Commissioner pisaah hrileng chungchanga Kolasib district dinhmun leh ramria hmalakna kalpui dan sawipuiin DC hian Kolasib District chhunga Covid-19 dona kalpui dan ziahna bu ‘Documentation on Covid-19 Volume-II’ a hlan bawk a ni.

Attachment

  • Loading attachment...