No.3229/2021-2022
Aizawl, 1st December, 2021 : Lengteng bialtu MLA Pu L. Thangmawia chuan nimin khan Saitual-Saichal kawng NHIDCL in blacktop hna an thawh mek chu a tlawh a. MLA hi NHIDCL General Manager in tawiawmin he kawng blacktop hnathawh hi harsatna dang a awm loh chuan kum thar 2022 January thla chhunga zawh hman an in beisei thu MLA hi hnathawktuten an lo hrilh a ni. MLA chuan NHIDCL hotute hnenah hian nikum lama blacktop hnathawh zawh tawh, hmun thenkhat khawk leh awmte chu a rang thei ang bera siam that tir turin a hrilh a, blacktop hnathawh mek pawh uluk taka vil turin NHIDCL Engineer te a hrilh bawk a ni.


Pu L.Thangmawia MLA chuan a bial chhung Pawlrang khuaa MLA Fund hmanga Govt. Primary School Building sak mek tlawhin harsatna an neihte a hmunah a en sak a. Hlawh nei lova khawtlang hmangaihna avanga Pawlrang VCP kaihhruaina hnuaia hnathawh mek chu lungawithlak a tih thu leh tha taka an sak zawh ngei a beisei thu a sawi a. MLA in a tlawh lai hian a ban leh beam an zo tawh a, MLA hi Pi K.Lalsiamliani, SDEO, Ngopa in a tawiawm a ni.


Pu L.Thangmawia hian a bial leh Champhai North inkalpawhna tur, Hliappui-Aiduzawl inkar, MLA Fund a laih mek chu a tlawh a. Pu Thangmawia chuan he kawng hi Hnahlan tlangdung tana kawng pawimawh tak a nih avangin sawrkarna a chan tirh veleh Champhai North bialtu MLA Dr ZR Thiamsanga nen theihtawp chhuah a hma an lak nghal thu leh Chief Minister hnenah leh PWD hotute hnenah pawh an thlen nghal thu te, estimate leh a kawng survey hna pawh PWD in an zawh vek tawh bakah fund awm thei angte zawn char char nimahse hripui leng avangin a la hlawhtlin theih rih loh thu te, He kawng hian Hnahlan leh Aizawl inkar kawng hi km 40 chuang laia a tih tawi dawn avangin Sumo tal an tlan theih nan Champhai North bialtu MLA nen mahni bial ramri chin ve ve MLA fund hmanga laih an tum ta a ni a ti.

Attachment

  • Loading attachment...