No.3230/2021-2022

Aizawl, 1st December, 2021 : Vawiin khan Health Minister Dr R Lalthangliana chuan Aizawl Civil Hospital Emergency (Casualty) Ward tihchangtlun leh cheithat chu a hawng a. Health & Family Welfare Board Vice Chairman Dr ZR Thiamsanga, MLA chu khual zahawm a ni.

Dr R Lalthangliana chuan Aizawl Civil Hospital chu kawng hrang hrangin hma a sawn a, casualty chei thar, changtlung, fai leh hmuhnuam tak leh Baptist Church of Mizoram Zotlang Bial te hmalaknain vantlang inthiarna thianghlim tak siam thar a ni chu lawmawm a tih thu a sawi. Trauma Center building thar hlak sak tan mek a nih thu Health Minister chuan sawiin a puitlin hunah chuan he building-ah hian department dang tawt taka awm mek te pawhin an chhawr tangkai thei dawn a, a nghahhlelhawm tawh hle a ni, a ti a. Kal leh zunkawng thalo te enkawlna tur Super Specialist doctor-in a thutchilh Nephrology Department hawn a ni tawh a, ICU pawh kum tam tak khum 5 chauh kan neih hnuah tun hnaiah khum 10 dah belh a ni a, MRI pawh dah thuai tura hmalak mek a ni, Minister chuan a ti.

Dr R.Lalthangliana chuan Sawrkar Hospital hi miin an en rawn, Aizawl Civil Hospital phei chu hmun dang atang pawha damlo refer nana hman thin, kan damdawi in neih that ber a nih avangin mi mit a fu a, ho teah sawisel hlawh leh ho teah fak hlawh a awl em em a ni, a ti a. Mihring dam chhung reilotea pawimawh ber midangte tana rawngbawl hna thawk tu doctor, nurse leh medical mi te chu indaih lo, buai leh hah taka an thawh mek laiin an tawngkam tha ringawt pawh damlote tan damna a tling tih hre thar leh turin a fuih a ni.

Dr ZR Thiamsanga chuan Mizoram thingtlang kilkhawr zawkah te damlo ten enkawlna tha zawk an dawn theih nan Rural Health Service tihchangtlun zel tul a tih thu a sawi a. Doctor, nurse leh health worker indaihlohna a nasa em em a, chuti chunga mipui tana hah taka thawktu medical mite a fak a ni. Aizawl Civil Hospital Emergency ward tha taka chei thar a ni chu lawmawm tiin COVID-19 hripui leng mek karah mipui mamawh Health Department in hma chak taka a sawn chho zel chu lawmawm a tih thu MLA chuan a sawi a ni.

Aizawl Civil Hospital Emergency Ward chei that nan hian cheng 45,92,274 sen a ni a. Civil Hospital Casualty a la awm ngai lo Heart rate, blood pressure, ECG, SPO2 en theihna Patient Monitor thar pasarih (7) dah thar a ni a. Khum thar engemawzat dah belh niin a chhung pawh cheithar a ni. Casualty bul, Hospital Gate chhungah Public Toilet thar tha tak, Baptist Church of Mizoram (BCM), Zotlang Pastor Bial, Aizawl te sum thawh cheng nuai 4.2 hmanga sak a ni bawk.

Vawiin programme hi Health & Medical Education Director Dr T.Lalhmangaihi’n a kaihruai a. Health & Family Welfare Department hnuaia section hrang hrang hotute an tel a ni.