Vawiin chawhma khan Food, Civil Supplies & Consumer Affairs Minister Pu K Lalrinliana’n Mualkhang LPG Bottling Plant thlawhin, Petroleum And Explosives Safety Organisation (PESO) endikna hnuhnung berin a a phut ang thil tul thenkhat siam belh a ngaih avanga hna chawlh lailawk, chhun zawm leh thuai a nih theih dan tur te an rel a, Pu HL Rochungnunga, Commissioner & Secretary, FCS&CA leh FCS & CA department leh Kolasib DC Office-a hotute bak ah Mualkhang leh Khamrang khawtlang hruaitute an tel bawk a ni.

LPG Mualkhang Plant Manager Pu Z Lhungdim in a tarlan danin, Oil Industry Safety Directorate Standard 169 zawm tur a Mualkhang Bottling Plant hi duan a ni a, hemi tur hian kum 5 dan zel ah endikna kalpui thin a nih thu a sawi a. Endikna neih hnuhnung ber ah khan Standard 169 in a phut ang, hmun thenkhat a kang thelhna (Automated Fire Hydrant) mumal tak siam te, Plant huam chhung felfai tak a hung te, khawl lian bunna hrang hrangah lirthei luhchhuahna tha tak hmun hnih zel a siam te leh LPG dahkhawlna bur lian (Bullet Tank) chu chhan hrang hrang avanga hmun thenkhatah a chhah dan tur ang a phak tawh loh avang te in ni 16, January 2020 atang khan Bottling Plant ah hian hna chawlh lailawk a nih tak thu a sawi.

Mualkhang leh Khamrang khaw tlang hruaitute pawhin he hunah hian Mualkhang LPG Bottling Plant chu khaw mipuite tan a eizawnna tangkai tak a nih thu Minister hnen ah thlenin, a tul ang a hna chhunzawm leh thuai a nih theih nan hma la turin an ngen nghal bawk a ni.

Mualkhang LPG Bottling Plant a tlawh zawh hian Circuit Conference Hall, Kolasibah Minister hian Kolasib District department officer thenkhat kawmin COVID-19 lak a inven nana Kolasib district inpuahchah dan te ngaihthlak a ni a, Kolasib district chhung a sawrkar hmalakna kal mek leh hmachhawp hrang hrang te sawi ho a ni bawk. He thutkhawm ah hian SEDP kaltlangin PWD National Highway Division 5, Thingdawl te chuan Kolasib leh Kawnpui inkar kawng thawm that hna an thawh mek thu tarlan a ni a, khum 100 awm theihna Damdawi in sakna turin hma lak mek a nih thu ngaihthlak a ni bawk.