Food Civil Supplies and Consumer Affairs Minister Pu John Rotluangliana chuan Rawpuichhip Supply Centre Godown MT 350 lenna chu vawiin khan a hawng. Minister hi Parliamentary Secretary Pu TT Zothansanga leh KVI Board Chairman Pu K. Lianzuala bakah Supply Department official-ten an tawiawm a ni.
Supply Kudam hawnna puala vantlang inkhawm buatsaihah FCS&CA Minister chuan Rawpuichhip leh a chhehvel khuate tana tangkai em em tur, a hmaa la awm ngailo Supply Centre puitlin a ni ta chu Department thawktute thahnemngaihna chungah leh khaw mipuite tawiawmna chungah lawmthu a sawi a. Tunah hian Department hnuaiah Godown siamthat (pukka building) zawh tawh 17 a awm thu leh, a dang 27 pawh hman tura peih mai tur a awm thu a tarlang bawk a. Minister chuan kudam a ruah apiangin mipuite fairelbel a khat thin thung a ni tiin, buhfai sem dan chungchangah pawh mamawh dan ang zelin (need based) a kal anih thu sawiin, tun kalphungah hi chuan hun rei taka chhek khawl vanga buhfai chhia leh sazu lo ei awm thei a pumpelh dawn a ni, a ti.
Minister chuan ration card lem leh diklo sing thum chuang paih a nih tawh thu tarlangin, en nawnna neih a nih zel tir thu a sawi a. Ration Card a kan inziah danah duham vanga diklo deuha member zat te ziahluh lakah fimkhur tlan a pawimawh thu a sawi a. Mipuiin buhfai an tlakchham loh nan MIZOFED atanga Rs.25/Kg rate a buhfai Sorkarin a lei te chu mipui hnenah Rs.15/Kg a hralh anih thu tarlangin, Food Security Scheme hnuaia AAY chhungkaw khatin thla khatah Kg 35 chu Rs.3/kg rate-a an lei thu te, PHH te chuan mi pakhat in Kg 5 Rs.3/Kg leh Kg3 Rs.15/Kg (a vaiin mi pakhat in thla khatah Kg 8) thu sawiin, Food Security in a huamloh chin pawh member tin in Kg 8, Kg khat Rs. 15 in an lei thung a ni, a ti.
Parliamentary Secretary Pu TT Zothansanga leh KVI Chairman Pu K. Lianzuala te pawhin Rawpuichhip mipuite vanneihna chu an lawmpui thu leh, hmasawnna dik tak a awm theih nana ram hmangaihna dik tak rilru put a pawimawh thu an sawi a ni. He hun hi FCS&CA Director Pu Lalramnghaka chuan kaihruaiin, Er. Lalthanzuala, EE PWD (Project Division II) chuan Godown sak dan report tlangpui a pe a. FCS&CA Secretary Pu Franklin Laltinkhuma chuan lawmthu sawiin hun a khar a ni.
Rawpuichhip Supply Centre hian khua pasarih (Dapchhuah, Dilzawl, Hmunpui, Rawpuichhip I & II, Rulpuihlim, Saitlaw leh Tuahzawl) a chawm dawn a. Storekeeper pakhat leh staff pahnih in enkawlin, Godown bakah Quarter 2 a awm a ni. Vawiin a hawn tak Supply Godown hi Rural Godown Programme (CSS) atanga cheng nuai 52.26 sanction hmanga sak a ni a. Godown sak nan (civil work) cheng nuai 45.74 bituk niin, 24.4.2013 a sak hna tan chu 26.9.2014 khan zawh a ni a. Metre 210.6 bial a zau niin, ruahtui dawnna (Rainwater Harvesting Tank) litre 30,000 dawng leh Overhead Tank/ Syntex tuizem litre 2,000 dawng siam a ni bawk. Tunah hian buhfai quintal 781.79 a awm mek a, Rawpuichhip Supply Centre-in a chawm khuate mamawh zat hi quintal 406.50 a chhut a ni.
