Centre for East and North-East Regional Studies Kolkata (CENERS-K) chuan October thla tir lamah Mizoram Sawrkar leh Mizoram University te nen tangkawpin “Mizoram : Gateway to South East Asia? What needs to be done?” tih thupui hmangin ni hnih awh tur inrawnkhawmna leh sawihona Seminar buatsaih an tum a. Hemi chungchang sawiho turin vawiin khan Chief Minister Pu Lal Thanhawla hovin Chief Minister’s Conference Hall-ah meeting neih a ni.

Chief Minister Pu Lal Thanhawla chuan CENERS-K in Act East Policy pawimawhna hria a, he policy kaltlanga Hmarchhak leh India in kawng hrang hranga hmasawnna a neih dan tur hmu thiam a, chutah Mizoram dinhmun pawimawhna hmu lawk a, hetiang Seminar huap zau tak Mizorama an buatsaih tum chu tha tiin an hmalakna chu lawmawm a ti a. Kaladan Multi Modal Transport Project zawh hunah Act East Policy hi huamzau zawkin a hman thei tur thu sawiin chumi atan chuan tun atangin kawng hranga kan inpuahchah a ngai a, kan rilru sukthlek leh kan ngaihdan te engemaw chen kan her rem leh kan siamthat a tul dawn a, chumi atan chuan he Seminar hi thil tangkai tak anih ka beisei a ni, a ti a. Meeting ah hian Chief Minister chuan tunhnaia External Affairs Minister Pi Sushma Swaraj nen inkawmhona an neiha, Mizoram leh Myanmar chungchang an sawihona tlangpui a sawi lang tel bawk a ni.

Meeting ah hian CENERS-K in programme an duan lawksa te sawiho ani bakah kawng hrang hranga inpuahchah dan te sawiho a ni bawk a. Seminar rawn hmanpui turin External Affairs Minister chu sawm nawn leh nise tih leh NITI Ayog aiawhte pawh CENERS-K in sawm se tih rel a ni bawk.

Meeting ah hian Chief Secretary Pu Lalmalsawma; Principal Secretary to CM Pu Lal Ramthanga bakah Secretary engemaw zat an tel a ni.  

Ruahman lawk dan chuan Seminar hi October ni 5 leh ni 6 a buatsaih tum a ni a. Bangladesh, Myanmar, Nepal leh Bhutan atangtein mi pawimawh engemawzat hun hmang tura beisei an ni.