August thla kar hmasa ber hi khawvel pumah ‘World Brastfeeding Week’ atan hman thin a nih angin vawiin khan Aizawl Civil Hopsital Conference Hall-ah Health Minister Pu Lal Thanzara hovin he Week leh ‘Mother’s Absolute Affection’ Programme hawnna neih a ni a. He hunah hian H&FW Dept. Principal Director Dr.K.Ropari chuKhualzahawmniinHospital& Medical Education Director Dr.K.Lalbiakzuala, Director of Health Services Dr.Rohmingthanga Ralte, Aizawl Civil Hospital Medical Superitendent Dr.K.L.Remsanga bakah Social Welfare Department officials, Health Department doctor, nurse leh staff an tel.

Khuallian Health Minister chuan Nu hnutetui pek ‘breastfeeding’ hi naupang nunna atana thil pawimawh tak a ni a; Pathianin naute tan liau liaua a siam a nih avangin nausen thihna 20% hi nu hnutetui hian a pumpelh tir thei a, kawthalo leh awmna avanga naute kum 1 hnuailam thihna pawh nasa takin a vengin an puitlin hnuah pawh an fing bik a, natna kaichhawn theihloh thisen sang leh zunthlum ang lakah a veng a ni, a ti. Nu hnutetui hi siamchawp aiin a hriselin naute dam khawchhuana atana a pawimawhzia hriain sorka pawhin nau neih chawlh (maternity leave) pawh tun hmaa thla 3 ni thin kha tunah chuan thla 6 a pe tawh a, hemi mai bakah sorkar chuan Child Care leave pawh kum 2 thleng a phal tawh thu a sawi. Ministry of Health & Family Welfare chuan programme thar ‘ Mother’s Absolute Affection (MAA)’ a rawn chhawp chhuak leh ta a, Nu hmangaihna tluangtlin chuan nu leh naute inlaichinna atana hnutetui a pek pawimawhzia pawh a tilang chiang hle a ni, a ti. MAA hi kum 1 chhung August 2016 atanga July 2017 thleng kalpui tur a ni a, hemi atan hian mipui zingah nu hnutetui pek pawimawhna uar zawka hrilhhriata zirtirna pek tum a ni a; District tithate chu lawmman pek an ni dawn tih Minister hian a tarlang bawk.

Health Minister Pu Lal Thanzara chuan a thusawi zelnaah vawiin atangin Thenzawl-ah AYUSH Hospital hawn tan a nih tawh thu sawiin damlote admit nghal theih turin khum engemawzat pawh dah nghal a ni, a ti a. Falkawn Referral Hospital pawh sorkarin theihtawpin tih chantlun leh Medical College dinna tur pawh chak takin hmalak mek zel a nih thu a sawi a. Health Department chu mipui zawng zawng dawr an nih avangin tunlai khawvel social media chak tak awm tawh hnuah an chet fuh loh hlek pawh thehdarh vak a ni thin chu pawi a tih thu sawiin Minister chuan Health Deaprtment hnathawkte inpekna leh thahnemngaihna chungah lawmthu a sawi a, sawiselna karah pawh theihtawp chhuah zel turin a chah.

Breastfeeding Week leh MAA programme hawnna inkhawmah hian Khualzahawm Dr.K.Ropari pawhin thusawiin kum 2000AD hma zawngin sorkar laipui chuan rampumah ‘Health Care for All by 2000AD’ a kalpui a, kum 2000AD hnu chuan sorkarin ‘Millenial Health Development Programme’ a kalpui leh a, he programme-in a tum ber chu natna laka khawtlang chhanchhuah (disease-free social life) a ni thun tih a tarlang.

Vawiina inkhawm Chairman Hospital & Medical Education Director Dr.K.Lalbiakzuala chuan  khawvel pumah ‘health care’ sawina apiangah nu hnutetui pek hi dah pawimawh em em a ni a, rampumah Mizoram chu a tithate zingah a tel pha  chu a lawmawm hle a, sorkar laipui pawhin Mizorama an hmalakna a fak thin a ni, a ti. Ministry of Health & Family Welfare chuan tun hnaiah naupang kum 0-5 inkarte tan ‘free healthcare’ a duan bakah naupang kum 18/19 an tlin hma chu ‘Free Adolescent Health Care’ a chhawpchhuak thar tawh a, hei hi Mizote pawhin hman tangkaina chang hre deuh deuh turin a chah.

Director of Health Services Dr. Rohmingthanga Ralte pawhin thusawiin nu hnutetui pek that hian nasa takin nausen thihna ‘Infant Mortality Rate (IMR)’ a tihniam a ni, a ti a. India ram mihring damchhung tura hisap ‘National Life Expectancy’ hi kum 68 vel nia chhut a nih laiin Mizoramah chuan mipa kum 20-45 inkar thi (kum 2015 chhung khan hmeichhia thi aiin mipa 410 an thi hnem) an tam avangin hriselna atana thalo sim tur leh taksain a ngeih ei leh in tha leh insawizawi uar deuh deuh a tul thu a sawi bawk. 

World Aliance for Breastfeeding Action (WABA) chuan naute hnute pek pawimawhzia hriain kum 1992 atang khan ni 1-7 August chhung hi ‘World Breastfeeding Week’ atan a puang a, He Week hi khawvel ram hrang hrang 170 chuangin kumtin hian Thupui neiin an hmang thin a, kuminah chuan thupui atan ‘Breastfeeding : A Key to Sustainable Development’ tih thlan a ni. World Breastfeeding Week-in a tum ber chu Nu hnute pek chawisan, humhim leh hnute pe tura tanpui a ni a. Vawiin Week hawnna inkhawmah hian Dr.Lalmalsawmi Hmar, HoD, Dept of Paediatrics chuan ‘Importance of Breastfeeding and WBW 2016 Theme’ chungchangah Presentation a nei a; ACH Med. Supdt. Dr.K.L.Remsanga’ lawmthu sawina hun hmangin hun a khar a ni.