No.3627/2021-2022

Aizawl the 11th January 2022: Vawiin chawhnu khan Taitesena Hall, Venglai, Kolasibah National Handloom Development Programme (NHDP) kaltlangin Mizoram Handloom & Handicrafts Development Corporation Ltd. (ZOHANDCO) chuan State Handloom Expo 2022 an buatsaih a. Pu K.Lalrinliana, Minister of State, Food, Civil Supplies & Consumers Affairs, Kolasib Assembly Constituency bialtu MLA ni bawk chu khuallian niin Pu C.Lalrammawia, Chairman, ZOHANDCO chu khual zahawm a ni a. Pu V.L.Chhuanga Chhangte, Board of Director-in Handloom Expo 2022 hawnna hun hi a kaihruai a ni.

Minister Pu K.Lalrinliana chuan ZOHANDCO buatsaih State Handloom Expo 2022 chu Mizote hnam ziarang phochhuahna hun remchang a nih bak ah kan thiamna leh theihna hmanga siam chhuah hnam thuamte chu ram pawn thleng pha sumdawnna kawng sah kuakna hmanraw țangkai tak a nih theih thu a sawi a. Chumi tur chuan a siamna hmanrua leh bungrua siam chhuahna kawngah pawh intodelh tur a țan lak a ngaih thu a sawi bawk a ni. Khuallian chuan Handloom Expo chu Handloom leh Handicrafts lam a tui mite tihphur zual nan leh țhangtharte tan pawh tuina thar petu a nih ngei theih nan duhsakna a hlan bawk a ni.

Pu C.Lalrammawia, Chairman, ZOHANDCO pawhin Handloom leh Handicrafts lam a hmalakna kalpui dan hrang hrang tarlanna hun hmangin Mizo puan 5 chu GI tagging tih tawh a nih thu leh a dangte pawh tih chhunzawm tur a hmalak mek a nih thu a sawi.


ZOHANCO hmalakna hian 2019-20 khan Aizawl, Saitual leh Hnahthialahte Special Handloom Expo neih niin 2020-21 chhung khan Aizawl leh Lawngtlaiah National Handloom Expo buatsaih a ni a. Special Handloom Expo hi Lunglei, Siaha, Champhai leh Serchhipah 2020-21 chhung khan kalpui leh niin 2021-22 chhung hian State Handloom Expo hi a Kolasib district bak ah Aizawl leh Mamitah buatsaih tum a ni. Kolasiba State Handloom Expo kalpui mek ah hian Stall 34 awmin Mizo kutchhuak hnam thuam chi hrang hrang lei theih a pho chhuah a ni.

Attachment

  • Loading attachment...