No.3628/2021-2022
Aizawl, the 11th January, 2022: Kumin kumtharah hian 28 Hrangturzo A/C chhunga khaw 9 laiah Covid hripui vei hmuh an ni tawh a. Khaw thenkhat phei chu Restricted / Containment Area-a puan hial a ni.
Hetiang karah hian Bialtu MLA Pu Lalchamliana, Home Minister chuan a bial mipuite harsatna hriain PPE, Pulse Oxymeter leh a tul ang zelin sum leh pai tanpuina a pe chhuak a. Kar hmasa lam khan heng khua : 1)East Lungdar 2) Mualcheng 3) Sailulak khaw VLTF hruaitute kutah a lo hlan tawh a ni. Vawiin ni 11 January, 2022 (Tuesday) hian heng khua ah te hian tanpuina sum a pe chhuak leh:
1) Bungtlang : ₹ 40, 000.00
2) Piler : ₹ 20,000.00
3) Biate : ₹ 10,000.00
Tun dinhmunah Hrangturzo Assembly Constituency khaw 17 ah hri kai zawng zawng hi 812 an awm tawh a, mi 56 dam chhuak tawhin mi 756 ten hri hi an la vei mek a. Pathian zarah he hri thihpui erawh an la awm lo a ni.
Pu Lalchamliana chuan, "Krismas leh Kumthar vuak vet boruak atanga vawiin ni thlenga hri vei an awm belh zel chu pawi a tih thu a sawi rualin ; Damdawi In lama thawktute, VLTF hruaitu leh Bial chhung mipuite nena thawhhona an neih that thu leh lawmawm a tih thu a sawi a.
Hripui hian engchen nge min la chiah dawn a hriat loh avangin sawrkarin SOP a siamte ngai pawimawh zel tura mipuite ngenin, sawrkar tha tichak zawnga hma la zel turin Bial mipuite a sawm a, damlo te chu dam thuai turin duhsakna a hlan a ni.
