4862/2025-2026

Dated Aizawl, the 17th March, 2026 : Vawiin khan Food, Civil Supplies & Consumer Affairs (FCS&CA) Department chuan ‘World Consumer Rights Day 2026’ pualin Dawrpui Multipurpose Centre-ah programme an buatsaih a. Pu B. Lalchhanlova, Minister, FCS&CA Department chuan he hun hi khuallian niin a hmanpui a, Pi Teresy Vanlalhruaii, Secretary, FCS&CA chuan a kaihruai a ni.

Minister Pu B. Lalchhanzova chuan vawiina kan kalkhawm chhan chu midangte tana thil tha kan tih duh vang a nih thu sawiin, MCU leh tlawmngai pawl dangte pawh mahni hlawkna tur um vang nilovin midangte tana thil tha tih duhna avanga in din an nih thu a sawi a. Mipuite hian bungrua, ei leh in leh service hrang hrang an leina kawngah dikna chanvo an neih thu leh an chanvo an hriatchian a pawimawh thu a sawi a. Dawr kai, sumdawng mite, pawl leh sawrkar department hrang hrangte chu mipuite tana dawr nuam leh rintlak an nih a pawimawh thu sawiin, mipuite pawhin thil kan lei dawnin kan thil lei tum kan belhchian a pawimawh thu a sawi a. Mitinte hian rinawm takin kan hna theuh kan thawha, mi rintlak kan nih chuan Mizoram nuam leh changkang kan siam dawn a ni, a ti a. Minister chuan kumin kal meka buhfai lei nan vaibelchhia 220 dah atang khan vaibelchhia 138 vel sawrkarah an thehlet thu tarlangin, hei hi bukna dik hmang tura hma an lak avang te, buhfai bo thlau tur an ven avang te leh subsidy ennawn a nih avang te-a sawrkar sum hum thei an nih thu a sawi a. Vawiin khan Land Revenue Department chuan hna thawh that avangin Ministry of Rural Development hnauia Department of Land Resources atangin SASCI Part VII-A hnuaiah lawmman vaibelchhia 29 an dawn thu a tarlang bawk a ni.

Pi Teresy Vanlalhruaii pawhin he hunah hian thu sawiin, mipuiten thil lei chungchangah harsatna an tawh chuan Consumer Rights Commission hnenah an harsatna an thlen theih thu a sawi a. Hei bakah hian mipuite chanvo humhalh nan sawrkar chuan CPGRAMS leh Mipui Aw te a siam thu a tarlang a, FCS&CA Dept chu hetiang harsatna chungchangah an helpline no 1967-ah biak theih an nih thu a tarlang bawk.

Kumdangah chuan World Consumer Rights Day hi March ni 15-ah hman thin a ni a, amaherawhchu kuminah March ni 15 hi Chawlhni a nih bakah, Mizoram Legislative Assembly Budget Session ni 16 thleng neih a nih avangin, vawin ni 17 hian Aizawl bakah District Headquarters tinah a rualkhai-in World Consumer Rights Day 2026 hmanna hi neih a ni a. Kumin atana thupui (theme) thlanchhuah bik chu ‘Safe Products, Confident Consumers’ tih a ni.

Vawiin inkhawmah hian Prof. Laldinliana Varte, MZU, Member of State Consumer Protection Council & Subject Matter Expert, Mizoram chuan kumin theme ‘Safe Products, Confident Consumers’ chungchang inhrilhfiahna hun a hmang a. Prof. Laldinliana chuan thil siamchhuaktu ten bungrua leh ei leh in tur tih chingpen an chin thin avangin consumer tamtakin an rinna (confident) an hlauh phah thina, consumer ten kan chanvo kan hriat chiana heng thil diklo te hi do ngama, a siam thatna tura hma kan lak zel hi a pawimawh hle a ni tih a sawi.

He hunah hian Mizoram State Consumer Welfare (Corpus) Fund atanga Consumer awareness activities neihna tura sum pek VCOs/Institutions 3 - Mizoram Consumers Union (MCU), Hqtrs, Aizawl, Centre for Consumer Education leh Consumers’ Club, Gov’t Mizoram Law College te atangin an Achievement Report ngaihthlakna neih a ni. Mipuite hnenah Consumer Protection Act 2019 chungchang te, LPG home delivery te, sumo leh bus (public transport) rate leh thil dangte hrilhhriatna hun an hmang thin a ni.