4863/2025-2026 

Kolasib, the 17th March, 2026 : Vawiin khan I&PR Conference Hall, Project Veng, Kolasib-ah Food, Civil Supplies & Consumer Affairs Department, Kolasib bultumin World Consumer Rights Day, 2026 chu ‘Safe Products, Confident Consumers’ tih thupui hmangin hman a ni a. Pu H. Lalramliana, SDO (Sadar) chuan khuallian niin he hun hi a hmanpui.

Khuallian Pu H. Lalramliana chuan thu sawiin, mihringte hi ramsa anga mahni bil tea khawsa thei kan ni lova, huhoa khawsa tura siam kan nih avangin midangte nen kan inmamawh tawn vek a ni, a ti a. Mihring hrim hrim hi consumer (thil lei leh hmangtu) kan nih vek avangin midang tana tha tur zawk ngaihtuah thiam consumer tha kan nih a ngai a ni, a ti.

Khuallian chuan consumer te hi mahni maia awm thei lova midang mamawh tawn theuh kan nih thu sawiin, "A bikin Mizote hian phai lam kawng a pin hleka thil inleilawk vak te, mahni thlaithar lo tih to nghal vak te kan ching thin a. Heng hi a Kristian lova, kan tihdan kan thlak a hun tawh hle a ni," a ti a. Kan mamawh ang hi midang pawhin an mamawh ve tih hria a consumer tha nih tum theuh turin Consumer Rights Day pual hian rilru sen thar a tul thu a sawi bawk.

Khualzahawm Pu Lalbiakthanga, President, Kolasib District Consumer Union (KODCU) pawhin thu sawiin, kum 1999 atanga KODCU bultan a nih thu a tarlang a. He pawl din a nih hma chuan Kolasib leh a chhehvela dawrkaiten an thil zawrh man rate an duh duh zata an bithliah mai thin thu sawiin, tunah chuan KODCU hmalakna avangin consumer ten an dikna chanvo an hmu tawh a ni, a ti. Consumer Rights chungchanga mipui zirtirna (campaign) pawh zirna inah te leh TV channel kaltlanga talk show-ah te an lo neih tawh thu leh, mipuite pawhin dikna chanvo an hrechiang tawh hle thu a sawi a. District huamchhung khua 30 chuangah branch din a nih tawh thu tarlangin, tun dinhmunah chuan consumer-te kan thangharh tawh hle a ni, a ti bawk.

He hunah hian 'Consumer-te hamthatna' tih thupui hmangin Pu B.S. Thapa, Adviser, KODCU in zirtirna a pe a; ‘Safe Products, Confident Consumers’ tih thupui hmangin Pu Clement Lalhriatpuia, Member, District Consumer Disputes Redressal Commission chuan kalkhawmte hnenah zirtirna a pe bawk.

World Consumer Rights Day hmanna inkhawm hi Pu Joseph Lalnuntluanga, DCSO, Kolasib chuan a kaihruai a, he ni hman a nih chhan leh a tangkaina te sawina hun tawi a hmang a. Pu K. Lalfakzuala, Accounts Officer, DCSO Office, Kolasib chuan lawmthu sawiin hun a khar a ni.
Kumtin World Consumer Rights Day hi March ni 15-ah hman thin a ni a, kuminah erawh Pathianni-ah a tlak avangin vawiin hian hman zawk a ni.