2390/2024-2025

4th October, 2024 : Vawiin khan Food, Civil Supplies & Consumers Affair Minister Pu B. Lalchhanzova leh Northeast Frontier Railway (NRF) General Manager Pu Chetan Kumar Shrivastava te chu Guwahati-ah an inkawm. Pu B.Lalchhanzova chuan September ni 27, 2024-a Hailakandi District-a Jamira Station bula railway track tuilianin a tihchhiat chu a hmuna a tlawh thu leh a hmuna thuneitute nen railway track siamṭhat a nih theih thuai dan tur an sawi ho tawh thu a hrilh a. Pu Chetan Kumar Shrivastava chu Hmarchhak biala Indian Railways-a thu neitu sang ber a nih angin he kawng siam hi theihtawpa lo hmanhmawhpui turin a chah a ni.

NFR General Manager hian he railway track hi Mizoram chak lakluhna kawnga a pawimawhzia an hriat thu leh rail service chhunzawm a nih vat theih nan siamṭhat hna thawh mek chu an vil reng thu Minister hi a lo hrilh a. Minister-in Jamira station bula railway track siamṭhat hna a hmuna a lo han tlawh chu lawmawm a tih thu sawiin khami hnu khan ruah a sur leh tak fo avanga an tum anga chaka hma an la theilo chu pawi a tih thu a sawi. Tun October thla chhunga hna zawh hman an tum thu a lo hrilh bawk a ni. Pu Shrivastava hian tun kum chhunga Sairang thleng railhead luh tir an tum chu Kawnpui Station-a leimin a awm avangin nakum kum lai hawl vel an tinzawn a ngaih tak thu Minister hi a lo hrilh a ni.

Minister leh GM inkawmnaah hian Principal Chief Operations Manager Pu Bibhuti Bhusan Gupta, CE Pu Sandeep Sharma leh Mizoram House DRC Pu D. R. Saithangpuia Sailo te an tel bawk a ni.