2391/2024-2025

Aizawl, the 4th October, 2024: State Level Unique Identification Implementation Committee  chu vawiin khan Secretariat Conference Hall, Aizawl-ah Chief Secretary Dr. Renu Sharma, IAS, kaihhruaiin neih a ni a, he hunah hian Commodore Dhiraj Sareen, Deputy Director General, UIDAI, Regional Office, Guwahati pawh a tel a ni.

Chief Secretary Dr. Renu Sharma chuan kum 5 & kum 15 nih hunah Mandatory Biometric Update (MBU) neih a pawimawh thu sawiin, School Education Department chu school naupangte'n samkhai zawka biometrics an update zung zung theih nan school-a special MBU camp neih dan tur ruahman turin a hriattir a ni.

Deputy Director General, UIDAI, Regional Office, Guwahati Commodore Dhiraj Sareen chuan Mizoram Sawrkar chu online Birth Registration No. (BRN) kaltlanga naupang kum 5 hnuai lamte ziahluh zel tum turin a ngen a. Registrar-te chu nau piang hlimte an pian hnu lawkah Aadhaar No. pek chhuah nghal zung zung an nih theih nan Birth Registration Based Aadhaar Enrollment (BRBAE) kalpui turin a fuih a. Mizorama Birth Registration Based Aadhaar Enrollment kalpui a nih theih nan National Health Mission, Mizoram chu UIDAI hnuaiah Registrar atan ruat a ni a. BRBAE hlawhtling taka kalpui a nih theih nan UIDAI chuan Civil Registration System (CRS) Portal-a nau piangte ziahluh zung zung a nih theih nana State policy ruahman turin rawtna a siam a ni.

Meeting-ah hian Aadhaar chungchanga thu pawimawh hrang hrangte sawiho a ni. Aadhaar enrollment kalpui dante thlirho a ni a, Mandatory Biometric Update & Birth Registration Based Aadhaar Enrolment chungchang sawiho a nih bakah District Level Aadhaar Monitoring Committee-te hnathawh dan thlirlet a ni a, Aadhaar hman dan chinte pawh ngaihtuahho a ni bawk.