FCS&CA Minister Pu K. Lalrinliana chuan vawiin khan Bilkhawthlir Agro Farmers' Society kum 10 tlin lawmna hun chu khuallian niin a hmanpui. 

Khuallian chuan thu sawiin, mizoram ah thlatinin ration atan buhfai quintal 1.1 Lakhs sem thin ani a, chutah chuan mizo thar a tel ngai lo ani tiin, mizo te hian ei leh bar ah kan intodelh a pawimawh thu leh intodelh tura hma kan lak a tul thu sawiin, hemi kawnga hma la tu, AFS te hmalakna chu fakawm a tih thu a sawi.

Pu K. Lalrinliana chuan SEDP chu dinhmun ngelnghet neilo ten dinhmun ngelnghet an dina, an tu leh fa te tan thleng pawha rochun tlak dinhmun nghet an neih theihna a tana hma lakna tur ani a, SEDP ngaihtuah tur hian board hrang hrang 14 din anih thu a tarlang bawk.

Minister chuan Agro Farmers Society te hmalakna a sorkarin mizo te buhfai thar a lei thei chu lawmawm a tih thu sawiin, lei tur an neih chhung chu sorkarin a lei zel tur thu a sawi bawk. 

Agro-Farmers Society kum 10 tlin lawmna Bilkhawthlir North VC Conference Hall a neih hi Society Chairman C. Lalchhuanawman kaihruaiin, Secretary Pu Lalrochana hnen atangin an Society hmalakna hrang hrang report ngaihthlak ani a.

Agro-Farmer Society Bilkhawthlir hi kum 2009 a din niin tun dinhmunah member 10 an awm meka, kumin kumtir khan an member te tharchhuah leh an pawlin an lakkhawm Buhfai Quintal 23 chu Mizoram sorkar Supply Department ah an chhunglut tawh a, hei bakah hian tun dinhmunah Sorkar a chhun luh tur Buhfai Quintal 70 chuang neikhawl tawhin quintal 300 vel an tlin theih an beisei bawk.