Union Home Minister Pu Amit Shah chuan vawiin khan lehlangin Aizawl a rawn tlawh. Pu Amit Shah hian North Eastern Council (NEC) buatsaih North East Handloom and Handicrafts Exhibition hawng turin vawiin chawhma dar 11:45 khan BSF Embraer thlawhna in Lengpui Airport ah a rawn tum a. Lengpui Airport ah hian Home Minister Pu Lalchamliana hovin sawrkar mi pawimawh ten Pu Amit Shah hi an lo dawngsawng a. Pu Amit Shah rual hian Dr Jitendra Singh, Union Minister of State (Independent charge) Ministry of Development of North Eastern Region (DoNER) pawh a lo thleng a ni.

Pu Amit Shah hian Lengpui atangin helicopter in Thuampui Helipad a pan nghal a. Thuampui Helipad ah hian Chief Minister Pu Zoramthanga, Lok Sabha MP Pu C. Lalrosanga, Assam Finance Minister Pu Himanta Biswa Sarma, Chief Secretary Pu Lalnunmawia Chuaungo, DGP Pu SBK Singh leh sawrkar mi pawimawh dangten an lo hmuak a ni. Helipad atang hian Pu Amit Shah hian North East Handloom & Handicrafts Exhibition neihna hmun Government Mizo High School Field Zarkawt a pan leh a, hetah hian Health & Family Welfare Minister Dr. R. Lalthangliana'n a lo dawngsawng a ni.  

Exhibition hawnna ah thusawiin Union Home Minister Pu Amit Shah, NEC Chairman ni bawk chuan India state te zinga state nuam leh mawi ber a an sawi Mizoram a tlawh nuam a tih thu sawiin, Mizoram chuan India democracy ah dinhmun sang tak a chang a, tun hma in Mizoram chu ram buai leh tharum  thawhna hmun a ni thin a, mahse tunah chuan chung hun khirh leh hrehawm te chu kalsan tawhin ram ralmuang tak a ni tawh a, India ram mai nilo khawvel thleng pawhin muanna leh in unauna puang chhuaktu leh hmeichher chhi tu, ti a hriat lar a lo ni ta a ni, a ti.

Tualchhung deh chhuah leh thil siam “handloom leh handicrafts” ten hmarchhak bial a hmasawnna a thlen theih dan sawiin Pu Amit Shah chuan, handloom leh handicrafts hmangin Mizoram mai nilo hmarchhak pumah nasa takin eizawnna kawng thar a inhawn belh thei a, hei hian mipui te anmahni kut leh ke a ding turin a puih thei dawn a ni a ti a, hengte hian  hmasawn turin theihna sang tak leh hmabak eng tak a nei ni a a hmuh thu a sawi bawk a. Modi Sawrkar hmasa in mau, thing anga chhiar thin chu horticulture product ang a thlak danglam hnu ah a bial anga hlawkpui ber chu hmarchhak bial a nih a rin thu leh a  beisei thu a sawi a, mau tamna hmun hmarchhak tan malsawmna a nih theih thu a tarlang bawk a ni.  

Union Home Minister chuan Prime Minister Modi-a kaihhruaina hnuaiah India hmarchhak chuan chak takin hmasawnna leh remna kawng a zawh tih sawiin hemi atan hian Prime Minister pawh a inpumpek tlat tih a sawi bawk a. An term hmasa kum 5 chhungin nasa takin Mizoramah hmasawnna a thleng tiin chung zingah chuan MW 60 pechhuak thei Tuirial Hydel Project te, Bairabi rel kawng lian nena thlunzawm te, kilometre 158 a thui Kaladan Multi Modal Project te, Myanmar ramri dep khua Hnahlan, Vaphai, Zote leh hmun danga Border Haat siam te, cheng vaibelchhe 51 senga sak Sainik School te leh project dangte a tarlang a ni.

A sawi zel naah Union Home Minister chuan 13th Finance Commission in Mizoram tan cheng vaibelchhe 19,974 a pek laiin an sawrkar hnua din 14th Finance Commission chuan Mizoram tan a hmasawnna hna hrang hrang thawh nan cheng vaibelchhe 42,972 lai a pe tiin a sawi. Central Scheme hrang hrang hnuaia Mizoram mipui sang tam takin hamthatna hrang hrang an dawn leh an hmuh te a tarlang bawk a ni. Mizoram chu state dangte nen hmasawnna kawnga pheichheh rual taka an rem theih nan leh kawng tin renga Mizoram a hmasawnna a awm thei nan, Mizoram in harsatna hrang hrang a tawh te sutkian na turin leh Mizoram pui turin engtik lai pawhin Prime  Minister Narendra Modi kaihhruai sawrkar chu a in huam reng a ni tih Mizoram  Chief Minister Pu Zoramthanga pawhin min lo hriatsak sela tiin a sawi a ni.  

Chief Minister Pu Zoramthanga chuan Home Minister Amit Shah chu Mizoram a lo kal a, India hmarchhak state zawng zawng huap Handloom and Handicraft Exhibition a rawn hawng chu lawmawm a tih thu a sawi a. Mizoram chu state dangte nen khaikhin chuan chak lakna tur chi hrang hrang a nei tlem bik hle a. Chutihrual chuan a chhunga awm sa leilung hausakna awm te a tangkai thei ang ber a hmang a ram tihhmasawn leh intodelh theih nan hmalak zel a nih thu a sawi a. Chung hmalakna hrang hangah chuan sawrkar laipui puihna pawh mamawh a nih thu sawiin Chief Minister chuan Mizoram chu India rama mimal sum lakluh Per Capital Income san ber na a nih theih tur thu a sawi.

Dr Jitendra Singh, Union Minister of State(Independent charge), Ministry of Development of North Eastern Region pawhin thu sawiin Pu Amit Shah chuan Home Minister anih hnu thla 5 lek chhung in Mizoram a tlawh nghal tih sawiin hei hi Mizoram leh state dang te an danglam zia a tarlang a ni, a ti a. State tenau, tlawh harsa leh hnufum bikte ten, state hmasawn dangte nena pheikhai rual taka hmasawnna kawng an zawh chu Prime Minister Modi kaihhruai sawrkar duh dan a ni tih sawiin a ruala hma kan sawn loh chuan duh angin ram a thang thei lo a ni, a ti. Kum 5 kalta a Mizoram a hmasawnna thleng hi kum 65 kal ta nena tehkhin chuan a danglam hle ni a a hmuh thu sawiin Dr Jitendra Singh chuan an Sawrkar chuan vote-bank politics an ngaihtuah lova, hmasawnna chiah an veiin an ngaihtuah tih a sawi a. Thalaite eizawn nan leh hna zawn nan Hindi thiam a pawimawh zia Mizoram Chief Minister pawhin tum engemaw zat Sawr Laipui ah thlen thu amah ngei pawhin a hriatpui tih sawiin Hindi zirtirtu a nghet a dah turin a rang lamin hma lak a ni dawn tih a sawi tel bawk a ni.  

Pu Himanta Biswa Sarma, Assam Finance Minister chuan lawmthu sawina hun hmangin North East Handloom and Handicrafts Exhibition hawnna inkhawm a khar a ni.

Exhibition hi NEC leh Mizoram Sawrkar tangkawp buatsaih niin October ni 8 thleng a awh dawn a, he exhibition ah hian Hmarchhak state hrang hrang kutchhuak phochhuah a ni.

North East Handloom and Handicrafts Exhibition a hawn zawh ah Union Home Minister Pu Amit Shah chuan Raj Bhawan tlawhin hetah hian Mizoram Larsap Prof. Jagdish Mukhi chuan a lo dawngsawng a, thil pek hlan in, Home Minister leh a thuihruai te pualin chaw chhun a lo buatsaih sak a ni.