Union Home Minister Amit Shah chu vawiin khan Raj Bhavan ah Chief Minister Pu Zoramthanga nen inkawm in, Chief Minister chuan Mizoram mamawh pawimawh hrang hrangte a sawipui.

Chief Minister chuan Union Home Minister hnenah Citizenship Amendment Bill chungchang te, Mizoram Border Guard Force a battalion pahnih dah te, Mizoram tan All India Services cadre hran neih ve a tul na te a sawi a. India sawrkarin Hindi tawng a ngaihpawimawh chhoh zelah Mizoram chuan Hindi zirtirtu a mamawh thu leh hemi kawnga harsatna state in a tawh te thlen in, Special Financial Assistance a sum dah belh chungchang te, Mizoram leh north east pum hmasawnna tura rua hmang tangkai a hmalak chungchang te a sawipui.

India leh Myanmar inlaichinna te sawi dun bawkin, Mizoram chu ram dang pahnih dep a awm a nih avanga Mizoram chuan international relations a pawimawhna a neih thu te Union Home Minister leh Chief Minister hian an sawi dun a. Pu Amit Shah chuan Mizoram chu kum tam tak chhung state ralmuang berte zing a mi a lo nih tawh avangin state dang buaina tawkte tan pawh entawntlak a nih thu a sawi a. Chief Minister thu thlen hrang hrangte chu a lo ngaihtuah zui sak tur thu a sawi.

Union Home Minister hi Chief Minister nen an inkawm zawh hian Joint NGO Coordination Committee member ten Citizenship Amendment Bill in Mizoram a huamloh na tura Special Provision siam chungchangah an hmu bawk a ni.

Union Minister Pu Amit Shah hi Minister of State for DoNER Pu Jitendra Singh leh Assam Minister Pu Himanta Biswa Sarma ten rawn tawiawm in, Governor Pu Jagdish Mukhi chuan Raj Bhavan ah hian a lo thleng a ni.

Attachment

  • Loading attachment...