2121/2023-2024

2023 Khuangchawi thla ni 3: Vawiin khan Government Kolasib College Week 2023 kharna hun, Kolasib Diakkawn YMA Hall-a buatsaih chu Food, Civil Supplies & Consumer Affairs Minister Pu K. Lalrinliana chuan Khuallian niin a hmanpui.

Khuallian Pu K. Lalrinliana chuan MLA leh Minister a nih hnua Govt Kolasib College tana theih tawp a chhuah ve ṭhin thu sawiin, tun dinhmunah College hma sawnna hmuh theih khawpa a ṭhang chu lawmawm a tih thu a sawi a. College week chu zirlaite tana inpawhna leh zirna piah lama inchher hriamna, nakin zel atana kawng min sialsaktu leh inrin tawkna min siamtu a nih avangin zirlaite tan a ṭangkai hle a ni tiin, GKC te'n tluang taka college week an hmang zo thei chu a lawmpui thu a sawi a. Taksa insawizawi te, hlim leh nuih te hi hriselna atan a pawimawh a, ei leh in thu-ah leh taksa invawn thu-ah vawiina inthlahdah hi nakinah a pawi thei tiin, zirlaite chu a hun laia insawizawi leh mahni taksa enkawl thlahthlam lo tur leh hlim leh nuih uar turin a chah a ni.

Minister chuan zirlaite chu week laia theih tawpa infiamna an bei angin, week zawh hnuah zirna kawngah theih tawp chhuah chhunzawm tura chahin, college kal lai chu hma hun siam hun a nih angin rilru nei taka lehkha zir a pawimawh a ni, a ti a. Mi hlawhtling ni turin Pathian hriat leh thawh hreh neih loh a pawimawh thu sawiin, zirlaite chu mi theih ang ti ve thei vek an nih inhria a, an tum tiruh tur te, ram leh hnam din chhuah nan a kila lung ṭangkai ber an ni thei tih inhria a, mahni inring tawk taka ke pen zel tur te, mahni, chhungkua, khawtlang, ram leh hnam tana mi ṭangkai nih tum tur leh chumi atana theih tawp chhuah zel turin a chah a ni.

He huna Uaptu, College Principal Pu T. Zahmingliana chuan Govt Kolasib College tana Minister Pu K. Lalrinliana'n kawng hrang hranga hma a lakpuinaah lawm thu sawiin, a hma laknaa College Science Laboratory tihchangtlunna tur cheng nuai 5 an hmuh aṭangin bungrua leh hmanraw mamawh chi hrang hrang eng emaw zat an lak khawm mek thu a sawi a. College week chu zirlaite zinga talent ṭha hai chhuahna leh pho lanna atan te, intihharh tharna leh tha tihchak tharna atan tea buatsaih a nih thu sawiin, week tluang tak leh hlawhtling taka buatsaih a nih theih nana sul sutu Students' Union te leh house tana theih tawp chhuahtu, item hrang hranga tel zirlaite chungah lawm thu a sawi a ni.

Govt Kolasib College Week 2023 kharna hunah hian SU Social & Cultural Secretary Lalropianga'n hunserh a hmang a. SU Vice President Lalramdina leh 2018-2019-a SU hruaitu hlui te hnen aṭangin thu sawi ngaihthlak a ni a. SU General Secretary Samuel Lalbiakzuala'n Week report a pe a. Zirlaite aṭangin zai ngaihnawm tak leh lam hmuhnawm takte ngaihthlak a, thlir ho a ni a. Zirlai chatuan ram pan ta mi pahnih, Amos Rochamliana Hualngo leh Brurya Lalthanpuii te sunna hun hman ni bawkin, SU Assistant General Secretary Lalzahngaia'n lawm thu sawiin hun a khar a ni.

Govt Kolasib College Week 2023 hi September ni 25 aṭang khan ṭan a ni a. Zirlaite house paliah inṭhenin, item hrang hrang hmangin an inel a. A pum puiah Black House chuan point 1,072 hmuin House Champion an ni a. Best House Leader atan Lalparliana, White House chu thlan niin, Best House Assistant Leader atan Cindy Lalṭhazuali, Black House chu thlan a ni bawk.

GKC Week Closing hi chawhnu lamah Jam Session-a hun hmangin, he hunah hian lawmman hrang hrang sem a ni.