2122/2023-2024

Champhai the 3rd October, 2023 – Vawiin khan Environment, Forests & Climate Change Minister Pu TJ Lalnuntluanga chuan EF&CC Complex, Bethel Champhaiah 'Nungchate Humhalh Hapta' - 69th National Wildlife Week chu Mizoram pum atan a hawng a ni. Kumin National Wildlife Week thupui hi Nungcha Humhalh Kawnga Thawhhona - "Partnerships for Wildlife Conservation" tih a ni.

Hawnna inkhawm Pu RS Sinha, IFS, Principal Secretary & Principal Chief Conservator of Forests, Mizoram kaihhruaiah EF&CC Minister Pu TJ Lalnuntluanga chuan Mizoram pum tan National Wildlife Week 2023 a hawng a, Nungchate Humhalh Hapta 2023 chuan Mizoram mipuite thinlungah hna thawk tharin, ramngaw leh nungcha humhalh kawngah mitin ten mawhphurna pawimawh tak kan nei theuh a ni tih min hriat thar tir tu ni se a duh thu a sawi a. Khawvel changkang chho zelah leilung hausakna, thing leh mau te kan ti chereu nasa hle a, chuvangin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni, a ti a. Ramngaw kan humhalh that chuan kan nunna hnar pawimawh tak tuihna pawh kan humhalh tel a ni tiin tun dinhmunah Mizoramah tui mamawhna a pun zel laiin tuihna in tlem lam a pan zel chu pawi a tih thu a sawi bawk.

Heng hi kan dinhmun anih avangin kan State-in hmasawnna kawng kan zawh chhoh mekah hian Environment humhalh nen kan kalkawp tir a tul takzet tih sawiin heh hi EF&CC Department thiltum anih thu a sawi a. Kan Mizo literature ah te ngei pawh khuarel leh sik leh sa chungchang phuahna a tam thu sawiin, hnam hmangaihna 'nationalism' thinglung nen pawh a kalkawp tlat a ni tiin, Mizoram mipuite National Wildlife Week, 2023 chibai a buk a, ramngaw leh nungcha humhalh pawimawh zia a hre tu mai nilova, nunpuitu nih theuh tum turin a sawm a ni.

Vawiin program-ah hian Forest Department thawktute, Champhai District Head of Office-te, Champhai MJA hruaitute, khawtlang hruaitute, YMA, MUP, MHIP, MZP, Champhai Nature Conservancy aiawhte leh zirlai thahnem tak an tel a. Pu NC Saravanan, IFS, Chief Wildlife Warden-in thu sawiin, Pu PC Laltanpuia, IFS, Field Director Dampa Tiger Reserve & DCF(WL) chuan Nungcha Humhalh Kawnga Mizoram Dinhmun - “Conservation of Wildlife in Mizoram” tih thupui hmangin powerpoint presentation a nei a, Pu K. Lalmuansanga, President, Association for Environmental Preservation (ASEP) chuan Khawtlang ina Nungchate Humhalh -“Community Wildlife Conservation in Mizoram” ti chungchang sawizauna hun a hmang a. Pu Lalduhthlana, IFS, DFO Champhai chuan lawmthu sawina hun a hmang a ni.

Pu Lalhlupuia, Champhai MJA Vice President & Honorary Wildlife Warden chuan I&PR Department leh MJA Champhai ten September ni 18-25 chhunga Sikkim Nature Learning Centre Tour an neiha an thil zirchhuah te Tour Report a pe a. Sikkim an cham chhung hian ICAR - National Research Centre for Orchids, Sikkim Himalayan Zoological Park, GB Pant National Institute of Himalayan Environment (Nature Learning Centre) te an tlawh a ni.

National Wildlife Week, 2023 hi October ni 2 atanga October ni 8 chhung a puan a ni a, vawiinah hian remchan zawkna avangin a hawnna hi neih a ni a. India ram hnampa Mahatma Gandhi piancham pualin India ram pumah kum tin hman thin a ni.