Vawiin chawhma khan Dr Hmingthanmawii, Chief Medical Officer, Kolasib pisaah District Coordination Committee on National Deworming Day, Kolasib district te chuan Ni 10, February 2020 a NDD kalpui dan tur relin an thukhawm.

Dr Hmingthanmawii chuan National Deworming Day 2019 hmannaah khan Kolasib district chuan naupang kum 1 leh kum 19 inkar, rulhut hlo pek tur bituk zat atangin za a 94.9 te pek an nih thu a sawi a, India rampum ang pawh a titha pawl a nih thu leh District a department hrang hrangte nen a thawh hona a that vang a nih thu a sawi. Chief Medical Officer chuan rulhut hlo sem hna tha tak a kalpui bakah hnathawh dan a hun tak a ziahluh leh thehluh a pawimawh thu a sawi a, NDD hman rual a hnathawh kalpui dan te felfai tak a ziak lut tur leh a hun tak a thehlut turin member te a chah bawk a ni.

Dr RK Lalthlamuana, SMO chuan naupang leh thalai te thisen tlakchhamna (Anaemia) laka ven an nih theih nan hunbi nei a rulhut hlo an ei a tul thu a sawi a, National Deworming Day hi kum khatah vawi 2 hman a nih thu leh, hemi ni apaing hian rulhut hlo, Albendazole, sem a nih thin thu a sawi bawk.

Vawiin thutkhawmah hian rulhut hlo te chu School, Anganwadi centre leh ASHA te hnen a sem dan tur te, school kal lo naupang te hnen a damdawi pek dan tur te, damdawi pek zat felfai tak a chhiahchhiah leh thehluh dan tur te rel a ni a, NDD 2019 chhung a kalpui dan thlirletna hun neih a ni bawk.

National Deworming Day hi kum khatah tum hnih neih thin a ni a, February Ni 10 leh August Ni 10 ah te a ni. Nikum August thla a Kolasib district a NDD kalpuinaah khan naupang 31106 zingah 29521 te chu rulhut hlo pek an ni a, tun February 2020 NDD ah hian naupang 34655 te hnen a damdawi pek a nih theih nan ruahmanna siam a ni.