Transport Minister, State Level Road Safety Council Chairman ni bawk, Pu John Rotluangliana Office Chamber-ah ‘27th Road Safety Week’ chungchang ngaihtuahin State Level Road Safety Council meeting neih a ni a. Meeting-ah hian Council Member-te an tel tha hle.
Meeting kaihruaitu Pu John Rotluangliana chuan Kumin Krismas leh Kum Thar vuakvetah lirthei accident lian tham a thlenglo chu lawmawm a tih thu sawiin, Transport Department leh Traffic Enforcement-a thawktute thawhrimna leh inpeknaah lawm thu a sawi a. Minister chuan Mipui leh bungraw phur chi lirthei khalhtute tan fimkhur a tul thu sawiin dan bawhchhiate chu Supreme Court rorelna angin license cancel sak thlenga hrem theih a nih thu a tarlang bawk.
He meeting hian kumin atan Mizoram pumah Road Safety Week chu 8-12, February, 2016 chhunga hman turin a rel a. Kumin Road Safety Week slogan atan “Lirthei accident laka kan fihlim theih nan a takin hma I la ang u” tih thlan a ni a, sawrkar hmalak dan tur hrang hrang he hunah hian duan nghal a ni bawk. Road Safety Week denchhen hian media kaltlanga mipuite leh lirthei khalhtute fimkhur tur a inzirtir bakah District tinah Maxi cab driver-te tan training huaihawt tum a ni bawk.
Road Safety Week hawnna hi Fenbruary ni 8, zing dar 7:00 ah Transport Minister chuan Transport Department Directorate kawtah a nei dawn a ni.
