Vawiin chawhnu khan Environrment & Forests Minister Pu Lalrinmawia Ralte kaihhruaiin a pisaah Sub-Committee on Fire Prevention chuan Fire Prevention Week 2016 hman dan tur an rel.

Meeting hian Fire Prevention Week chu February ni 8 atanga ni 13 chhungin neih ni se an ti a, hawnna inkhawm chu February ni 8-ah Lal Thanhawla Auditorium-ah neih tha an ti. Kum dang ang bawkin kumin hian lo hal theih ni hnuhnung ber atan March ni 15 an ruat a, hun tiam pela hal an awm thin tih hriain kumin hian dan bawhchhetute hremna dan khauh zawka kalpui tha an ti. Kum kalta a hma an lo lak tawh dante thlir letin, khaw thenkhatin kangmei venhim kawngah nasa taka hma an sawn laiin khaw thenkhat erawh chuan an ti thalo hle tih hriat a ni a. DC ten anmahni District huam chhungah khapna dan an puang ang a, dan bawhchhetute chu hremna dan awmsa hmangin hrem an ni ang.

Fire Prevention Week 2016-ah District leh Village Level-a lawmman dawng turte thlan dan leh lawmman sem dan tur meeting chuan a rel a. District level-a lawmman dawng tur te hi Sub-committee on Fire Prevention chuan a thlang ang a, District level Fire Prevention Committee chuan village level-a lawmman dawngtu tur a thlang ve thung ang. Monitoring & Evaluation ti tur atan tlawmngai pawl hrang hrang -SENVA, CYMA, MUP, ASEP, NSS, STAM, AMFU leh Green Mizoram Network te ruat nghal an ni. Awareness Campaign chungchang pawh sawi hovin kum dang aia uar zawka kalpui tha an ti a. Mipuiten kangmei chungchanga kan lo fimkhur zawk nan a vawikhat nan Fire Mascot-ah sakhi chu hman nise tiin an rawt nghal bawk a ni.

Sub-Committee on Fire Prevention thurel leh rawtna hrang hrangte hi Chief Minister kaihhruai State Level Fire Prevention Committee -ah thlir ho leh a ni ang.

Sub-Committee-ah hian Principal Chief Conservator of Forests (PCCF) Pu Lalram Thanga, Environment & Forests Department hotute, Line Department hrang hrang bakah tlawmngai pawl (NGO) aiawh te an tel a ni.