Tukin khan Lawngtlai laili Areopagy ah Intensified Pulse Polio Immunisation (IPPI) 2016, Zenghri danna pek runpui thawhkhatna (Round 1) chu Lawngtlai District Task Force on Immunisation Chairman leh Lawngtlai Bawrhsap ni bawk Pu J. Hmingthanmawia’n a hawng.

Zenghri danna (Polio Vaccine) hi hunbi neia pek thin a ni a, India ramah hian kumtin January leh February thlaah naupang kum 5 hnuailam hnenah pek thin an ni. Mizoramah pawh vawiin Dt 19.01.15 hian pek an ni anga, a vawihnihna chu February 23 ah pek an ni thung ang. Lawngtlai District ah pawh vawiin hian pek tan a ni a, Pu J. Hmingthanmawia, District Task Force on Immunisation Chairman chuan naupangte chu damdawi eitirin Vaccine pek bul a tan a ni.

Pu J. Hmingthanmawia chuan, Zeng natna hi tihdam theihloh natna vaccine hmanga him taka inven theih lawi si a nih avangin Lawngtlai District chhunga naupang kum 5 hnuai lam zawng zawngte vaccine la vek turin a ngen a, nu leh pa leh khawtlang hruaitute pawh naupangten vaccine an lak vek theih nana ruahmanna siam vek turin a chah a ni.

Dr. Zothanpari Chhakchhuak, District Immunisation Officer chuan Lawngtlai District ah vaccine pekna hmun 177 siam a nih thu leh, chungah te chuan Health Department a thawk leh Anganwadi a thawkten an pe tur thu a sawi a. Lam hla deuhva kal turte phei chuan nimin lamah an vaccine pekna tur khua an pan tawh thu a sawi. Health Department Population Survey danin vaccine pek tur, naupang kum 5 hnuai lam hi 18153 awm tura beisei an ni.