4560/2025-2026
Aizawl dated 21st February 2026: Vawiin chawhma khan I&PR Auditorium, Treasury Square, Aizawlah Ministry of Food Processing Industries, Government of India hnuaia FINER bultumin 'Regional Interaction Meet of Food Processing Industry' buatsaih a ni a. Dr. KC Lalmalsawmzauva, Adviser to CM (Implementation of Handholding Scheme) chu khuallian niin he hunah hian Pu Lalthazuala Royte, Chairman, MIFCO, MSPCC member-te, Commerce & Industries Department-a thawktute, MzSRLM a thawktute leh Agriculture lama hmalatute leh sumdawnna bultan tumte an tel a ni.
Khuallian Dr. KC Lalmalsawmzauva chuan Mizorama kuthnathawktute chu Bana Kaih Scheme hmangin thuam chak mek an nih thu sawiin an thlai tharchhuahte vawn that nan leh him dam taka thawnchhuah nan vawiin thutkhawm thupui 'Packaging' chu thil pawimawh leh tangkai tak a nih thu a sawi a. Eitur leh bungrua tuamna te chu a chhung ami a vawn that mai bakah customer-te hipna pawimawh tak a nih thu sawiin, a leitu tur ten an hriattur pawimawh tak tak tarlanna a nih bawk thu a sawi. Adviser to CM chuan ei leh bar a intodelhna turin leh kuthnathawktute thlai tharchhuah man man zawka tihral thin a nih theih nan Mizoram Sawrkar chuan Bana Kaih Scheme chu tangkai takin a hman mek thu a sawi a. Phase -1 ah kuthnathawktuten Bana Kaih Scheme hnuaia thlai thlan chhuah bik, Sawhthing, Aieng, Hmarchate leh Hmunphiah thar chhuah kawngah hmasawnna hmuh a nih thu tarlangin, Phase 2 ah hian thlai tharchhuahte tha taka sawngbawl hna, 'Processing' ah tan lak chhoh zel tum a nih thu a sawi. Dr. KC Lalmalsawmzauva tarlan danin Bana Kaih Scheme Phase 1 kalpui chhung khan Progress Partner 392 hnenah Loan pek a nih thu leh Progress Partner 2713 hnenah CM Special Package sem chhuah a nih bawk thu a sawi a. Phase 2 kalpui mekah hian Progress Partner 917 te thlanchhuah an nih leh tawh thu sawiin Progress Partner tha leh rintlak thlanchhuah hna hi kalpui chhunzawm zel a nih thu a sawi.
Adviser to CM chuan vawiina entrepreneur lo kalte chu 'Processing' an kalpuina kawngah a packaging an uluk ang bawkin a chhunga eitur (Product) awmte pawh a hriselin a thianghlim hle tur a nih thu a sawi a. Insumdawntawnna chu rinawmna a innghat a nih avangin sumdawng hlawhtling ni tur chuan taimakna leh rinawmna vawng nung tlat turin kalkhawmte a chah a, Mizoramin hmasawnna hmel thar a hmuh zel theih nan kalkhawmte chu thawhhopuiah a sawm bawk a ni.
Regional Interaction Meet hi Pu Francis Sailo, Member, Agriculture and Food Processing Committee, FINER chuan a kaihruai a, Pi Mayuri Bora, Assistant Director, FINER chuan kalkhawmte lawmna thu a sawi a. Pu Amitabh Ray, Chief Manager, FINER chuan MOFTI hnathawh dan sawifiahna hun a hmang a, Pi Jyotismita Devi, Manager, New Product Development, Manjushree Innovations Pvt. Ltd., Pu Dinesh Maurya, Ganpati Packaging and Assembling, West Bengal, Pi Puja Borah, Executive Assistant, Saarthi Propack, Assam-te chuan Packaging chungchanga hriattur pawimawh hrang hrang, Powerpoint presentation hmangin an sawifiah bawk a ni.
