4561/2025-2026

Lunglei, 2026 Ramtuk thla ni 21: Nimin khan Public Works Department (PWD) hnuaia Lunglei khawpui chhung kawngpui siam ṭhat hna thawh mek chu Lunglei West bialtu MLA Pu T. Lalhlimpuia leh Lunglei South bialtu MLA Pu Lalramliana Papuia te chuan enin, department hotute leh hna thawktute nen ṭha tak leh chak zawka hna thawh a nih theih dan tur an sawi ho.

MLA-te hi Lunglei Municipal Council (LMC) Vice Chairman Pu K. Lalrinawma bakah, PWD Lunglei Road Division-I Sr Executive Engineer Er SR Lalramthanga leh a thawhpuite'n an ṭawiawm a. Hna thawh tawh chin enfiahin, hmabak leh hmachhawp awm te, harsatna awm thei hrang hrang pumpelh leh chin fel dan tur te an sawi ho nghal.

PWD Minister puitu MLA Pu T. Lalhlimpuia chuan Lunglei khawpui chhung kawngpui siam ṭhat hna thawh mek chu fur hmaa zo hman ngei turin a chak thei ang ber leh a ṭha thei ang bera hma la turin thawktute a hriattir a. ATL Road siam ṭhat hna thawktu contractor-te pawh chak tak leh ṭha taka hna thawk turin a chah bawk. Kawng siam mekah Lunglei mipuite pawh traffic chungchangah hna thawktute thu zawm a, hna thawkte harsatna thlensak lo hram tura ngenin, kawng ṭha a awm theih nan hna thawktute chauh ni lovin, Lunglei mipuite ṭawiawmna a pawimawh thu a sawi.

Lunglei khawpui chhung kawngpui siam ṭhat hna hi February ni 19, 2026 (Ningani) aṭang khan thawh ṭan niin, AOC aṭanga Pukpui Manguri Petrol Pump chhak thleng, kilometre 12-a thui siam tur a ni a, ATL (Aizawl–Thenzawl–Lunglei) Road kawng siam ṭhat mek nen a inzawm chiah dawn a. Dense Bituminous Macadam (DBM) 50mm-a chhah chungah Bituminous Concrete (BC) 30mm-a chhaha phah hnan tur niin, tunah hian Lunglei AOC aṭanga Chanmari-a Pu Samson-a In zawn thleng DBM hi phah tawh a ni.

AOC aṭanga Pukpui inkar kawngpui (main road) zai zai siam ṭhat a nih dawn bakah hian, veng chhung inkal pawhna kawngte pawh Paver Finisher len theihna chin chu cheng vaibelchhe 5 bawr vela siam ṭhat tura ruahman a ni bawk a. Veng chhung inkal pawhna kawng siam tur chin hi tunah hian thliar fel mek a ni.

Lirthei tlan chak lutuk tur dan nana kawng chhun pawn (speed breaker) siam chu National Highway Inkaihhruaina Dan (NH Norms)-in a phal loh avangin kawngpui siam ṭhat hna thawh mekah hian khawtlang leh veng ṭhahnem ngaihnaa speed breaker siam tura lo nawr lo tur leh mahni thua lo siam ringawt lo turin MLA-te leh PWD hotute chuan khawtlang hruaitute leh mipuite an ngen bawk.

MLA-te leh PWD hotute hian lei min vanga Theiriat kawng chung PWD kawng tlabal pawh en nghalin, tun hnaiah he lai kawng hi motor te chi (light motor vehicle)-in a zawh theih tura hma lak dan tur te an en nghal a. Theiriat Local Council hruaitute'n lo dawngsawngin, hma lak dan tur an sawi ho va. Local Council te chu kawng kal dan tur ruahmanna siam a, a hmun vel lo sam fai tura ruat niin, an sam fai hnuah PWD hotute'n an en leh ang a, chumi hnuah kawng siam dan tur ruahmanna siam tum a ni.