Mizoram sorkar hnathawkte inzawm khawmna pawl Federation of Mizoram Government Employees & Workers(FMGE&W) chuan vawiin khan an pawl khawmpui lian vawi 28-na Vanapa Hall-ah an hmang a. Chief Secretary Pi L.Tochhawng chu Khuallian a ni.

FMGE&W khawmpui chawmhma hun hi an pawl Vice President Pu Ramhmangaiha Ralte in a kaihruai a. Khuallian Pi L.Tochhawng chuan FMGE&W leh Mizoram sorkar inkara thawh hona tha tak a awm thei chu lawmawm a tih thu sawiin sorkar hnathawkte chu an hna a rinawm tur leh hlemhletna chi hrang hrang laka fihlim turin a chah a. Mipui rawng an bawlna kawngah Dan huang chhungah chuan mirethei leh chanhai zawkte chunga zangaihna lantir fo turin a chah bawk. Khawvel hmasawn zelah mipui ten sorkar lakah beiseina an nei sang tial tial a. Mipuite beiseina ti hlawhtling tura sorkar kut tichak turin sorkar hnathawk te chuan  mawhphurhna sang tak an nei a ni, tiin Pi Tochhawng chuan sorkar hnathawkte chu intuai hriam thar zel turin a chah a. Hun vawn dik leh inthununa tha ngai pawimawh turin a fuih bawk a ni.

Chawhnu hun hi FMGE&W President Pu R.Lalrammawia’n kaihruaiin khawmpui rorel neih a ni a. Khawmpui thurel ah hian sokar hnathawkte ACR/PAR uluk leh fimkhur zawka vawn a nih theih nana hmalak te, sorkar hnathawkte D.A tuna GPF a dahsak chu a tam thei ang ber sorkarin pe chhuak tura hma lak te, Service Association chak leh thiltithei zawk ten a tel zawk leh chaklo zawk te post an luahsak thin titawp tura hma lak te, 6th Pay Commission rawtna anga Mizoram sorkar hnathawk ten Transport Allowance an hmuh ve theihna tura hma lak te rel a ni a. Kum 2 chhunga an pawl hruaitu tura atan hengte hi thlan an ni : 1)R.Lalrammawia Transport Department;  2) Ramhmangaiha Ralte H&TE; 3) C.Chhundenga Social Welfare; 4)C.Lalnunzira Sericulture 5) F.Lalthlamuana Horticulture; 6) J.Ramdinmawia Eco& Statistics; 7)K.Lalsawmvela PWD; 8) Lalremsanga Khiangte Home; 9) R.Laltanzuala Industries; leh 10) Zothangzuala Chhangte Transport.