Vawiin khan  Federation of Mizoram Govt. School Teachers (FMGST) Conference vawi khatna chu Dawrpui Multipurpose Hall-ah  hman a ni a, Education Minister Pu Lalchhandama Ralte-in Khuallian niin a hmanpui a ni.

Khuallian Education Minister Pu Lalchhandama Ralte chuan ram hmasawnna kal chhoah zirnain hmun a luah thuk hle a. Zirna kalphungah zirtirtu Association hrang hrangte duhzawng a inang lo deuh thin a, chutihlaia Zirtirtu Association hrang hrangte insuihfina zirna leh zirtirtu pawl hrang hrangte hmasawnna  tura inthliarna awm hauh lova Federation of  Mizoram Government School  Teachers (FMGST) din a ni chu lawmawm a tih thu a sawi a ni.

Minister chuan Education Department chu  sorkar Department lian berte zinga mi ni siin Education Service Rules pawh nei lo a ni chu thil zahthlak ang reng tak a ni a ti a. Amaherawhchu Federation-in hemi tihhlawhtlin a nih theih nana hmachhawp an nei chu fakin a dawngsawngtu, a fatu a ni thei tur chu lawmawm a tih thu a sawi bawk. Minister chuan Transfer Rules mumal neih loh avanga harsatna tam tak awm thin chungchang pawh tarlangin, Service Rules neih hunah chuan hengte pawh hi chinfel a ni ang a, awmna hmun siksawi a nih pawha dawngsawng thei tura  zirtirtu zawng zawng inhawn a tul dawn tih a sawi.

Chief Minister Pu Zoramthanga’n  Education leh Health lam chu ngaih pawimawhah min dah dawn tih sawiin Minister chuan Budget Session hmasa berah heng pual hian sum tam zawk dah a ni ang a ti a. Zirtirtu indaihlohna awm mek pawh tihziaawm a nih theih nan MPSC hnuaiah Primary leh Middle School Teacher hna lak kalpui mek a nih thu  leh Budget Session hnulamah indaihlohna zualpui tih reh nan zirtirtu tam zawk  Contract emaw Muster Roll-a lak tum a nih thu a sawi a ni.

Continuous and Comprehensive Evaluation (CCE) hman mek hi zirtirtu indaih tawk loh vang te, thingtlang kilkhawr leh hmun tam zawkah an thatpui tawk lo em tih sawihona neih a nih hnuah hemi atang hian kalphung pawh her danglam hret a ngai dawn niin a lang a, FMGST Resolution-ah CCE chungchang hi a lo tel bawk nen, CCE chungchanga sorkar hmalakna thlawp turin Minister chuan zirtirtute a sawm a ni. Minister chuan ram, hnam leh culture milin  Academic Session thar atang chuan School timing tihdanglam tum a nih thu a sawi bawk a, tun thla chhungin sorkarin thu chiang a neih theih beisei a ni. 7th pay hman a nih tawh laiin a nghet lova thawk, a bikin SSA  zirtirtute hlawh chu central sorkarin a tihniam mek a, SSA zirtirtute dinhmun pawh ngaihtuah that leha Mizoram economy mila a tha thei ang bera an dinhmun siamtha tura sorkarin hma a lak tur thu a sawi.

Minister chuan zirtirtute tana thu lawmawm tak puangin 6th Pay Commission hnuaia zirtirtute Earned Leave nuai bo tawh chu 7th Pay hman hnuah Earned Leave ni 10 an neih leh tur thu a puang a. Sorkar sikula thawktu zirtirtute chu zirna quality siamtha tura mawhphurtu an nih thu leh zirlai chhawrtlak chher chhuak ngei tura tan la lehzual turin a sawm a ni.

FMGST ah hian Teacher Association hrang hrang 8 - MPTA, MSTA, MISSTA, MHSHTA, MMSHTA, MWETA, MSSTA, MIGAHTA intelkhawmin vawiin Conference-ah hian sorkar sikula zirtirtu thahnem tak an tel a, chawhnu lamah hruaitu an thlang nghal a ni.