No.5890/2020-2021

Federation of Mizoram Samagra (RMSA & SSA) Employees (FEMSE) chuan vawiin chawhnu khan Health & Family Welfare Minister dr. R. Lalthangliana chu a pisa ah hmu in Mizoramin COVID-19 dona kawngah leh a tul anga an hman atang ICU khum 5 an hlan a, Zoram Medical College a hman turin Refrigeratot lian 1 an hlan bawk. heng thilpekte hi FEMSE President Pu R. Lalnunhlima'n Health Minister hnenah hian a hlan a ni.

Thilpek hlan inkhawm tawite buatsaih ah Health Minister chuan COVID-19 dona kawngah zirtirtute leh Education department a thawkten thawhhlawk hle a ni tih sawiin, kan mamawh vanglai takin Ambulance thahnem tak min han pe a, hei bakah hian generator leh thil dang dang kan dawn bakah Chief Minister's Relief Fund ah sum thahnem tak an chhung bawk a, a bik takin zirtirtute phei chu thingtlang lamah an tangkai lehzuala, kan buai zual laia kawng min kawhhmuhtu leh a sulsutu tangkai ber berte chu zirtirtute an ni, a ti a. Zoram mipuite chhan nan FEMSE member ten an hlawh atanga ui hauh lova an thawhkhawm chuan malsawmna a thlen chhunzawm zel dawn a ni, a ti a. ICU khumte chu uluk taka ngaihtuahna senga a tangkai thei ang bera hman a nih tur thu a sawi.

FEMSE in vawiina an thilpek ICU khum 5 man hi Rs. 2,53,700/- a ni a, Mizoram sawrkarin a tangkai thei ang bera a hman turin an hlan a, Refrigerator lian ZMC hnena an hlan hi litre 4600 a ni. FEMSE hian April thla khan an member te thawhkhawm atang Chief Minister's Relief Fund ah Rs. 9,84,000/- an lo chhunglut tawh a, July thla khan Hnahthial leh Khawzawl District Hospital-ah generator pakhat ve ve hlanin, September thla khan Saitual District Hospital-a hman tur dental equipment Rs. nuai 2,00,000/- man hu an hlan tawh bawk a ni. An pawl hruaitute chuan tun thleng hian COVID-19 dona kawnga an sum thawhkhawm chu Rs. nuai 26 a tlin tawh thu leh a hmanna tur ruahman sa bakah a la bang zawng chu CM's Relief Fund ah an chhunluh vek tur thu an sawi a ni.